فات آوان الكلام عن إمكانية أن يصلح من أفسد، أو أن يضع رؤية ناجحة من استعان بالفشلة! علشان كده.. سيبكم من الكلام عن أى تطوير، أو انتظار لفتح ملف تعديل، ووضع لائحة جديدة لاتحاد كرة القد «الجبلاية» خاصة أن هذا المجلس يلفظ أنفاسه الأخيرة.. ولا.. إيه رأى حضراتكم؟! يا سادة.. فى الشارع الكروى.. تعالوا نتحدث مع بعضنا البعض، ونفتح باب الأمل، لأن القادم لازم يكون أفضل وأحسن، ويساوى حجم مصر! بس.. وحياة اللى فات كله.. كله.. واللى هاننساه من الذكريات.. مش هانرفع شعار «لسة الأمانى ممكنة».. خالص! يعنى وبكل سهولة.. تعالوا نضع شروطنا كإعلام بكل طوائفه.. وشارع مصرى كروى، ونؤكد أننا أيد واحدة وسنضغط بكل ما لدينا من «باور».. مش «باور فاميلى» الفاسدة طبعا.. حتى يخرج للنور مشروع اتحاد الكرة لائقا جدا بمصر الجديدة! يا سادة.. فى الشارع الكروى.. الاتحاد المنشود.. سنطالب به.. أولاً: الست حكومة.. طبعا لأنها تمتلك كل الحق فى مناشدة الهيئات الدولية «فيفا».. «أولمبية».. «ثلاثية».. وتنقل لهم هذا الاحتراف الخرب، الذى لا ينتج مليما واحدا، وأيضا شكل المسابقات! مش كده.. وبس.. صور فوتوغرافية وفيديوهات للملاعب.. وأعضاء الجمعية العمومية! عندكم كمان.. المستوى الاقتصادى الذى تعيشه كرة مصر وجمعيتها العمومية صاحبة الأصوات! يا سادة.. فى الشارع الكروى.. ماما الحكومة.. أكيد هاتعرف.. ده.. لو ماكانتش عارفه.. أن وراء الاحتراف الكامل اقتصادا بأرقام تصل للمليارات بسهولة.. وتفتح باب المشاركة فى تقليل نسب البطالة؟! المشروع كامل عندنا.. ودعونى أقول لكم إنها المرة الأخيرة التى أتوجه نيابة عن كل محب لهذا البلد للحكومة لتسمعنا.. والمرة القادمة سيكون المطلب لرئاسة الجمهورية؟! إحنا بنتكلم عن مشروع.. ليه ماحدش عايز يسمع ويناقش؟! يا سادة.. فى الشارع الكروى.. إيه رأيكم.. أن نطالب بأن يصبح اتحاد الكرة كامل الاحتراف؟! طيب.. فين التسويق؟! هل يمكن الاكتفاء ببعض من يجتهد.. ومعاه كام رقم تليفون على شوية «إيميلات» لسمسارة مباريات؟! لأ.. طبعاً.. استثمار يعنى إدارة محترفة تقبض كثيرا.. وتدر أرباحا أكثر.. وأكثر! رابطة أندية محترفة.. لا شأن لمجلس الإدارة بها.. وعليها فقط تخطط لمستقبل المسابقات لتخرج منتخبات، وتصدر لاعبين بالملايين! الرابطة برواتب من الغالية.. ذى كل الدنيا.. تبيع: بث.. أفكار.. مساباقات.. وكله.. كله! يا سادة.. فى الشارع الكروى.. إيه رأيكم تكونوا معنا فى المطالبة الثانية.. للسادة المرشحين فى الانتخابات المقبلة؟! يا ريت.. ماحدش يقولى.. إن الوجوه لازم تتغير؟! لأ.. عادى جدا.. سنقبل أى وجوه.. إنما.. إيه بقى؟! البداية.. برنامج واضح.. لا يدخل فيه أن اتساع القاعدة يعنى إضافة هيئات لا تملك شيئا.. إلا دفع 3 آلاف للمشاركة فى الكأس.. وكام بنوتة من كليات تربية رياضية «كرة حريمى».. هيه.. عندك صوت؟! يا سادة.. فى الشارع الكروى.. سيكون المطلوب برنامج نتأكد أنه يشبه كل برامج الاتحادات المحترفة فى أوروبا.. ليه لأ.. يا حضرات! مصر.. فى أفريقيا = ألمانيا فى أوروبا.. عادى جداً.. حتى لو ظل القياس مع الفارق طول العمر! مرفوض أى شىء آخر.. وأعدكم بالتصعيد للفيفا.. والرئاسة.. و«جرسة» بنت عم فضيحة! بس لسه عندى أمل.. وبحب المشمش وهاأستناه.. وهانشوف الأول ماما الحكومة والسادة المرشحين.. هايعملوا إيه؟!
