التحقيق مع "عاطل" سرق محمول من "عامل" عقب قطع أوتار يده بحدائق القبة.. المتهم: "وأنا بسرقه استعطفنى وقالى سبنى رحت معوره فى أيده.. وقطع الطريق مربح أكتر من تجارة المخدرات"

انتشرت فى الآونة الأخيرة جرائم قطع الطرق فى بعض المناطق بمحافظة القاهرة، وهو ما حدث مع "أحمد.م.ع"، 29 سنة، عاطل، مسجل خطر، المتهم بسرقة محمول ومتعلقات "محمد.ا.و"، عامل، 20 سنة، عقب التعدى عليه وقطع أوتار يده اليسرى، بمنطقة حدائق القبة.
المتهم يقطع الطرق منذ أكثر من 5 سنوات
وكشفت التحقيقات فى القضية المقيدة برقم 8029 لسنة 2015 جنايات حدائق القبة، أن المتهم اعتاد على ارتكاب مثل تلك الجرائم منذ أكثر من 5 سنوات، وغيرها من الجرائم حيث تم اتهامه فى القضية رقم 7719 لسنة 2014 جنح الحدائق، آداب عامة، ومحكوم عليه فى القضية رقم 7053 لسنة 2011 جنح الحدائق، ضرب والمقضى عليه فيها بالحبس شهر.
وقال المتهم، خلال التحقيقات التى أشرف عليها المستشار عبد الرحمن شتله، رئيس نيابة حدائق القبة: "ليا أكتر من 10 سنين وأنا بحاول أغير من نفسى ودورت على شغل فى حتت كتير بس مكنتش بنفع فيها لأنى معنديش صنعه، ولان إخواتى الاتنين محترمين ومتعلمين، ووقفت فى طريق مستقبلهم بسبب تصرفاتى المستمرة الغلط، وموضوع قطع الطريق وسرقة الشباب اللى سنها صغير أنا بمارسه من فترة طويلة، لأنى كنت بكسب منه كتير جداً، أفضل من بيع المخدرات اللى كان ديماً بيعرضنى للخطر والقبض عليا".
وأضاف المتهم: "كنت ديماً بركز فى موضوع قطع الطريق مع الشباب اللى لسه سنهم صغير، لأنى مكنتش بلاقى منهم أى مقاومة، ولما كنت بلاقى حد بيحاول يعارضى كنت أول ما برفع عليه المطواة يقوم مدينى كل اللى معاه، وأكتر من مرة يعارضنى حد وأعوره فى أيده أو وشه وبعد كده يستجبلى على طول، كان ديماً يجيلى شعور إن الموضوع ده هينتهى بيا بكارثة، إما أقتل حد أو حد يقتلنى".
يوم الحادث
وتابع المتهم: "العملية دى بالذات مكنتش متفائل بيها من أول اليوم، لأنى أول اليوم صحيت على خناقه فى الشارع كانت بين عيلتين وانتهت على خير، وقبل ما قوم بالعملية حبيت أشرب فنجان قهوة والواد القهوجى وهو بينزل الطلبات من على صنية القهوة وقعت عليا وبهدلتنى، عشان كدا مكنتش متفائل، وساعتها قررت أنى أروح ومشتغلش النهاردة، وأنا راجع حوالى الساعة 2 ونص بليل لقيت شاب صغير فى السن ماشى فى الشارع والدنيا مضلمة ومفيش حد، الشيطان لعب فى دماغى، وقولت لنفسى جت لغية عندك يا معلم".
واستطرد: "وبالفعل رحت موقف الواد فى الشارع، وقولتله بقولك إيه يا كابتن أنا أمى فى المستشفى ولازم تعمل عمليه ومحتاج ألف جنيه ضرورى، ودى قصص أنا بخترعها فى كل سرقة علشان أنيم بيها اللى أدامى، الولد قالى والله يا باشا أنا لسه راجع من الشغل ومفيش معايا فلوس، وهو بيكلمنى رحت مطلع المطوة فجأة، وقولتله طلع اللى فى جيبك ياد، لكنه رفض، وقالى انا مفيش معايا فلوس، وكان ساعتها ماسك تليفونه فى أيده، رحت ماسك أيده وحاولت أخد منه التليفون، لكن هو قاومنى رحت معوره فى أيده وخدت التليفون وجريت وهو ساعتها كان عمال يستعطفنى ويقولى والنبى سبنى".
وقرر المستشار محمد أبو المعالى القائم بأعمال رئيس نيابة حدائق القبة، حبس المتهم 4 أيام على ذمة التحقيقات، على خلفية اتهامه بسرقة محمول ومتعلقات "محمد.ا.و"، عامل، 20 سنة، عقب التعدى عليه وقطع أوتار يده اليسرى.