"حجاجوفيتش" يقترح استخدام جهاز سويدى يعمل فى 57 دولة لتنقية المياه

كشف الرحالة المصرى، أحمد حجاجوفيتش، عن سفره إلى السويد، لمقابلة المخترعة السويدية، بيترا فادستروم، صاحبة اختراع "سولفاتان"، وهو عبارة عن أفضل جهاز لتنقية المياه فى القرن ال21، وذلك بعد كارثة سقوط 500 طن من الفوسفات، فى مياه نهر النيل بقنا.
وكتب حجاجوفيتش عبر صفحته على موقع التواصل الاجتماعى "فيس بوك"، "بعض المصريين خايفين من شرب المياه بعد حادثة غرق أكتر من 500 طن فوسفات فى مياه نهر النيل، وده اللى خلى جشع التجار يبتدى ويخليهم يغلوا أسعار المياه المعدنية".
وأضاف الرحالة المصرى حجاجوفيتش أنه بعد علمه بهذا الحادث سافر السويد عشان ليقابل المخترعة العبقرية السويدية "بيترا فادستروم"، وقال: "قدرت تعمل اختراع أكتر من عظيم لتنقية المياه اسمه سولفاتان، أو بالعربية مياه الشمس، الاختراع اللى فضلت تعمل تجاربه من التسعينيات لغاية ما نجح و بقى ملقب فى العالم بأفضل اختراع لتنقية المياه فى القرن الواحد والعشرين".
ووصف الجهاز قائلاً: "سولفاتان ده عبارة عن جركن مقسوم نصين كل نص 5 لترات ومصنوع من مادة قوية جداً مخصوصة بتخلى الأشعة فوق البنفسجية بتاعة الشمس تدخل للمياه المش نقية اللى فى الجركن وتنقيها 100٪ من كل البكتيريا والحشرات والميكروبات والفيروسات.. وتخليها آمنة تماماً للشرب حتى للأطفال الرضع وكل ده من غير استخدام أى كيماويات أو كهرباء أو أى حاجة إلا أشعة الشمس المباشرة والجركن عمره الافتراضى من 7 ل10 سنين".
وواصل: "يعنى كل اللى أنت عليك تعملوا هو إنك تملى الجركن بأى مياه ولو حتى من نهر النيل على طول، وبعدين تفتح الجركن فى أشعة شمس مباشرة وفى سنسور فى الجركن بيكون لونه أحمر لما المياه تكون مش نضيفة وبعدين على حسب قوة الشمس (من ساعتين إلى 6 ساعات) السينسور ده لونه بيبقى أخصر وبكده تبقى المياه نقية تماماً من أى حاجة ضارة بالصحة!! يعنى تشرب مياه من النيل مباشرة عن طريق الجركن ده، أنقى من مياه الحنفية".
وتابع: "الجميل فى الموضوع أن سولفاتان دلوقتى موجود فى أكتر من 57 دولة فى العالم ويعتبر سببا رئيسيا فى تراجع أعداد المرضى والموتى فى إفريقيا والمناطق الفقيرة فى أمريكا الجنوبية عشان الحكومات هناك بتشترى كميات كبيرة من الجراكن دى، وتديها للمواطنين عشان توفر لهم مياه شرب نقية.. ده اللى خلى الرئيس الأمريكى أوباما والأمير السويدى زى ما فى الصورة، والعديد من زعماء العالم تكرم المخترعة السويدية بيترا وتديها أعلى الأوسمة".
واستطرد: "والأغرب من ده كله إن ملك السويد اشترى عشرات الجراكن من سولفاتان عشان ياخدها معاه فى أى رحلة أو زيارة رسمية للبلاد التانية، ويديها هدية للملك أو الرئيس اللى بيقابلوا عشان يثبت أد إيه إن السويد كلها فخورة بالاختراع ده اللى حينقذ العالم".
واختتم: "إيه رأيكم لو الحكومة المصرية تشترى جراكن سولفاتان، وتديها لكل الناس المحتاجة فى كل أنحاء مصر من النوبة إلى رفح والسلوم عشان يشربوا ويطبخوا بمياه نضيفة وكمان رجال الأعمال اللى كلهم بيقولوا بنحب مصر، يتبرعوا بالجراكن دى لآلاف العائلات اللى ممكن بجد جركن من ده يغير حياتهم تماماً.. وأعتقد إحنا فى مصر معندناش أكتر من الشمس".
موضوعات متعلقة :
- الرحالة المصرى "حجاجوفيتش" يكشف "فنكوش" دولة "ليبرلاند"