تجار: "المصريون هيشتروا الفسيخ فى شم النسيم ولو ب1000 جنيه للكيلو"

رغم ارتفاع أسعار الفسيخ والرنجة فى موسم شم النسيم لهذا العام، بنسبة حددها التجار، بأنها تصل إلى 10% مقارنة بالعام الماضى، يقول سعيد الطحان تاجر الفسيخ بمنطقة الدقى، أن السمك البورى، الذى يصنع منه الفسيخ سعره ارتفع، ويبدأ سعر كيلو الفسيخ من 60 و70 جنيهًا فى الكيلو ليصل إلى 100 و120 جنيهًا وعلى الرغم من ارتفاع الأسعار إلا أن الإقبال يتزايد على الفسيخ والرنجة، كلما اقترب يوم شم النسيم.
وأضاف فى تصريحات ل"اليوم السابع"، "أكل الفسيخ والرنجة فى شم النسيم عادة قديمة والناس بتشترى الوجبة دى مهما غليت عشان لمة العيلة متكملش فى شم النسيم من غير فسيخ".
وقال أحمد عبد الرحمن، تاجر فسيخ بشارع فيصل، "المصريين بيتوحموا عالفسيخ والرنجة فى شم النسيم ولو بألف جنيه هايشتروه".
وأضاف محسن حلمى، تاجر فسيخ بمنطقة الحسين، "الرنجة الإقبال عليها طول السنة أكتر من الفسيخ، لكن أيام شم النسيم الفسيخ هو الملك وبعده الملوحة والرنجة".
وعن الأمراض التى يحذر منها الأطباء من تناول الفسيخ بكميات كبيرة، قال عيد حسن فسخانى بمنطقة السيدة زينب "الشعب المصرى معدته تتحمل الزلط.. بلع هموم السنين اللى فاتت دى كلها وهضمها يبقى مش هايهضم شوية فسيخ"؟!
وأضاف حمدى نعيم فسخانى بمنطقة إمبابة بيعنا فى 3 أيام اللى فاتوا حوالى 250 كيلو.. ربنا بيكرمنا فى موسم شم النسيم اللى بنستناه من السنة للسنة عشان نعوض أيام الركود اللى بنمر بيها أوقات كتير.. والفسيخ بنعمله زى الفل وعمر ما حد اشتكى من أكلنا".