جيمى حبيبي

السيد جمال عدى كلمة جامد ب 3 شوارع و ميدان، أيوة!! السيد جمال مروان طبعا. الراجل أهو جابلكم من الآخر يا صحافة و حزب أعداء النجاح و اتغدى بيكم قبل ما حد يتعشى بيه. طلع على الملأ و أعلن عن "الحقيقة المرّة."
رجل أعمال صاحب سلسلة قنوات.. قوى و مفترى و القرار قراره، ما بياخدش رأى حد. بفلوسه يعمل اللى هو عايزه وبس.. ما حدش يستجرى يقوله تلت التلاتة كام. الناس تضحك فى وشه و تقول أمرك يا جيمى. ما يعجبوش برضه، يروح خابط بأيده على المكتب، فيخافوا ويطلعوا يجروا عشان ينفذو أوامره قبل ما يخبطهم يلبسهم فى الحيط.
عادة لما حد يوصل للمركز ده بيبقى فى حالة نكران و بيتهيأله إن الناس بتخضع ليه لأنها بتحبه و تحترمه و كلهم رجالته، يفدوه بعنيهم. و بيصدقوا بجد قصائد المدح و الابتسامات فتاخد رجل الأعمال الجلالة قوى و تلاقيه لبس جناحات الملائكة أمام الإعلام.
يقوم الإعلام نافخه أكثر..لقاءات و توك شوز و الزفة اللى انتوا كلكم عارفينها... و رجل الأعمال مصدق إنه إحدى ركائز الاقتصاد القومى، رمز وطنى، ناصر المظلوم و مطبق الحق. سنة..اتنين..يمكن عشرة.
ثم بلا أى مقدمات.
هوب الراجل وقع ولاحدش سمى عليه. و تشتغل بقى وطوايط الظلام و طبلة ريا وسكينة " وهلاهلا ياللى عليكى الدور." فضيحة أخلاقية و كارثة و مصيبة و نايبة. الراجل النزيه نهب البلد.. أساء لسمعة الوطن. و نفس المذيع اللى كان من يومين قبل ما الفضيحة تطلع قاعد قدامه بيسأله "يا ترى بتقضى أوقات فراغك ازاى؟" طالع فى حالة تجلى ولا أم كلثوم "أنا فى انتظارك" يقطّع فى فروة الراجل. ويصرخ من لهاليب قلبه باسم كل المقدسات بأن ينال المتهم أشد العقاب.
جمال مروان جاب من الآخر و فرش الملاية طلع بنفسه قدام الكاميرا و استنكر "فن ايه؟ احنا بنعمل فلووس!" حتى الفنان هانى رمزى ماعرفش يبق معاه، طلع يضحك من مكتبه ومن غلبه مع الجبار، هانى رمى الشنطة و قال " ده مش بنى آدم!! اما وريتك يا جمال يا مروان!!" حتى المخرج الغلبان جيمى خلاه يطق من جنابه ويجز من تحت سنانه "بكرهك يا جمال يا مروان." ولا بوبى المسكينة ما سلمتش منه و اترمت عضم. معلش يا بوبى أصل الموضوع أداء يا حبيبتى مش مقاسات.
الراجل أهو ريّح الناس كلها. بدل ما حد يفضل يحوم حواليه و ينعبش على سى دى كدة ولا ماسيج فى التليفون كدة، هو بنفسه قال دى طريقتي.. دى سياستي.,. و بفلوسى ولو كان عاجبكم. هتقولوا ايه أكثر من اللى أنا قلته على نفسي؟ و كلفت فلوس علشان بوبى بنفسها تبتهل بأيديها للسماء و تدعى "أشوف فيك يوم يا جمال يا مروان"؟ الناس بتكرهنى و بتنافقنى و بتدعى عليا.. بس برضه هافضل أشتغل و أنجح. و ابقوا ورونى كدة بعد اللى أنا كشفته عن نفسى فى ايه تانى ينفع يتقال. بتهيألى كدة الراجل صعبها جدا على المنافسين و الاعلام انهم ينهشوا فيه أو يستنوه لما يطب.
ما تنسوش انو جمال مروان برضه هو اللى فتح عينينا على حسبة النجاح من خلال الحملة اللى فاتت. لازم تبقى وديع و توطى راسك قدام تهامى بيه و تقول "أستاذ." لغاية ما تبقى انت تهامى بيه صاحب الخطايا السبعة من الشهوة و الغرور للغضب. و ساعتها بقى بيع "لحم رخيص" زى مانت عايز. و شوفلك "مدام رشا" عشان تزودلها 60 مشهد فى الفيلم.
حقيقى الحملة دى محتاجة وقفة مع تعامل مصر مع رجال أعمالها. فمن سابع المستحيلات أن تجد رجل أعمال سعودى او خليجى لديه جرأة جمال مروان. و لكن ذلك لأن رجل الأعمال المصري، و المصرى فقط فى العالم العربى هو الذى دائما ما نسمع انه ارتبط بقضية فساد فيتم التشهير به على كل المستويات ،و من بعدها يزج به فى السجن الى ان ينساه الرأى االعام. ثم يستيقظ العالم العربى على فضيحة أخرى متبّلة و متبهّرة لرجل أعمال مصرى آخر.
و لأن الاعلام المصرى له هيمنة كبيرة على العالم العربي. فالشارع العربى يتابع يوميات ما يحدث فى قلب مصر، ولذلك عندما نسمع عن فضيحة تلو فضيحة أخرى لرجل أعمال مصرى يستغرب العالم العربى و يسأل"هل هذه أخلاق رجال أعمال مصر؟" و يندهش العالم العربى و يخبط كفا بكف على ما يكتشف من فضائح رجال أعمال مصر. الى ان وصل الحال بأن الشارع العربى أصبح ينتظر من التالي؟ من رجال أعمالك يا مصر الذى سيتشفّى فيه الشارع العربى قبل المصري. رغم أن رجال الأعمال الذين يمثلون القطاع الخاص لأى بلد انما هم ركيزة أساسية للوطن على المستوى الداخلى و الاقليمى و الدولى أيضا. و مع ذلك كل كام سنة نفاجئ بمشكلة جديدة مع رجل أعمال مصري.
لأ يا مصر. كفاية تعملى كدة فى ولادك. و بعدين لما هما مفتريين و أشرار كدة كنت بتفتحيلهم الأبواب على مصراعيها ليه عشان يعملوا فلوس؟ عشان بعد ما تطلعيهم سابع سما تخبطى بيهم سابع أرض؟ طب و سمعة القطاع الخاص؟ هما رجال الأعمال الوحشين دول مش فاتحين بيوت غلابة كثير؟ على ايه نشر الغسيل ده كله..
ما أنا مش فاهمة ايه اللى يضطر رجل اعمال انه يدفع التكاليف الباهظة لحملة اعلانية على قنواته علشان الناس تشتمه فيها و تدعى عليه؟ أكيد فكر مادام رجال الأعمال كدة كدة بيتبهدلوا، قبل ما الناس تشمت فيا، ألحقهم أنا و ادفع فلوس عشان اقول للناس بنفسى انى ظالم و مفترى وساعتها لما ييجى اسمى فى قضية ابقى ما سبتش للاعلام حاجة يقولها.
و أخيرا ربنا ما يورينى فيك يوم يا جمال يا مروان.
اعلامية سعودية