بالفيديو..إبراهيم عيسى:"الحكومة والحكم تربية السبعينات بينافقو الدين"

انتقد الكاتب والإعلامى إبراهيم عيسى، ما أسماه نفاق الحكومة والحكم للتيارات الدينية فى مصر، قائلاً: "يعنى مصر أصبحت متدينة لما طلع أذان الخمس صلوت فى التليفزيون، وفى سنة 65 التليفزيون ماكنش بيذيع الأذان كانت مصر مش متدينة!"، مضيفاً "هذا هو الجنان المحض الذى عشنا فيه من السبعينيات، الحكومة لغاية دلوقتى، والحكم لغاية دلوقتى، لأنه ابن تربية السبعينيات أثر فيه أبو الفتوح وعصام العريان، وأثر فيه اللى قالوا له يا أخى، وأثر فيه الالتزام واللى قالوا الحجاب من أركان الدين، إحنا قدام حكم حتى الآن لسه ملتزم باللى عمله الرئيس السادات فى السبعينيات لأسباب سياسية، أنه بينافق الدين وبينافق التيار الدينى، وأنه بيحول الدين إلى شكل وإلى مظهر، فخرب الدين وخرب التدين".
وأضاف، عبر برنامجه "20/30" عبر فضائية "on tv": "الفساد والتحرش فى مصر زاد خلال الأربعين عامًا الماضية فى نفس الوقت الذى زاد فيه النقاب والحجاب والدقن والجوامع والدعاة"، وقال: "كلما يزداد الدعاة كلما ازداد الفساد، لأن الدين يتحول إلى نفاق وشكل ومظهر".
واستطرد إبراهيم عيسى، "احسبوها يا جماعة، شوفوا عدد الجوامع واللحى والمنقبات وعدد المحجبات زاد أد إيه؟ وقارنه بالتطور المذهل للفساد اللى للركب والانحراف المالى والإدارى والأخلاقى، هذا يصب مرة أخرى أنه لحد دلوقتى محدش عايز يعالج حاجة".
وأضاف: "لسة البلد منافقة، عايشة بوشين لسة البلد ماعملتش ثورة على أفكارها، ويجى هنا الكلام، لما أى حد فى المجتمع المصرى؛ كتاب مفكرين غلطوا أو صحوا يقولوا آراءً مختلفة عن السائد، فيطلع الهجامة بتوع السلفيين اللى هما لحم كتافهم- لحم الجماعات السلفية فى مصر - من فلوس الجمعيات الخليجية، يطلعوا المجموعات دى يقوموا شاتمين ومكفرين أى حد يقول أى كلام مختلف، فيقوم شوية مشايخ فى الأزهر من اللى بيشتغولوا فى معاهد السلفين، واللى بيشتغلوا فى الجمعية الشرعية بتاعت الإرهاب اللى رئيسها عضو هيئة كبار العلماء فى الأزهر، اللى فى جامعة أم القرى وإيه اللى كلهم شغلين جمعيات كويتية.. فيه جمعية كويتية ممولة جمعية أنصار السنة المحمدية فى مصر اللى هى الجمعية الشرعية دى ب281 مليون جنيه فى 2011 دا كلام موجود فى ورق ومستندات، يقوموا مهاجمين أى حد يقول أى كلام مختلف، هيا بنا نتطرف نتسلف، هيا بنا نتشدد هيا بنا نتوهب - وهابية يعنى - هيا بنا نضيق على الناس أفكارهم، تقوم الحكومة تعمل إيه، حكومة رجعية مش مثقفة مش فاهمة مش ناوية تفهم، تقوم على طول تبتز وتصدق اأبدعياء المدعيين دفاعًا عن الدين، أنتى مالك أنتى، تقوم الحكومة متحفظة متزمتة، حكومة منافقة عايزة تنافق الشيوخ والمشايخ والسلفيين لأنها جاهلة، فتصدق الأدعياء المدعيين على الدين، لأنها مش فاهمة حاجة، عايزة تقول لا أنا متدينة أنا أخلاق أنا حلوة، متابعاً، أنتى مالك يا حكومة، أنتى مالك، ولدينا أزمة على مستوى الدين والثقافة والمجتمع عشان كدا فيه انحطاط فى المجتمع، ولسه البلد منافقة عايشة بوشين ولم تقم بثورة على أفكارها".