"نوران.. أسف وبحبك".. طالب يعتذر لحبيبته فى لافتة بأحد المبانى الجامعية

"نوران أنا أسف وبحبك".. كلمات كتبها أحد الطلاب على لافتة وعلقها على أحد المبانى للاعتذار لحبيبته، وتداول نشطاء على مواقع التواصل الاجتماعى فيس بوك صورة للافتة زاعمين أنها بجامعة عين شمس.
وفى رد فعل متوقع من الفتيات على الفيس بوك، أعلنوا الحرب على الشباب بالتعليق على هذه الصورة قائلين: "الحاجات دى كترت اليومين دول وكده غلط على صحتنا.. عن البنات أتحدث".
فيما علقت أخرى: "هو ده الكلام بيعلنها على مبنى الجامعة وأمام الناس وعايزها تسامحه مش رسالة على الموبايل".
وأوضحت إحدى الفتيات: "إيه الرومانسية دى هو زمن روميو وجولييت رجع تانى ولا إيه؟!"، وقالت أخرى: "خلاص بقى المفروض زمن التهاون ينتهى وبعد اللافتة دى ماننتظرش اعتذار أقل رومانسية من ده".
فيما رد الشباب: "هو فى أحلى من الكلمة الحلوة وبلاش تشريد وفضايح"، فيما قال آخر: "طبعا يا حياتى أنت تستاهلى كنوز الدنيا بس بفلوس الإعلان أجبلك هدية جميلة زيك ونخرج نتعشى عشوة رومانسية زيك وباقى الفلوس نحطهم فى البنك وأظن الرسالة وصلت للجميع: اللى يبص لعيشة الناس يتعب".
وعلق آخر ساخراً: "يا جماعة أكيد ده فى جامعة برة مصر والفوتوشوب مش مخلى".