إزاى بنحب؟

السؤال ده كتير منا ميعرفش إجابته وعشان ميعرفش الإجابة هو فعلاً بيحب، لأن سر الحب بيكون فى "معرفش".
الحب هو قصة لها بداية ولكن ليست لها نهاية، تبدأ القصة بهؤلاء الأبطال ونتعرف عليهم كما هو ترتيبهم "الانجذاب- النظرة- الابتسامة- كلمة- تعارف- إعجاب- انبهار- ارتياح- تعود- ثم آخر بطل "الحب".
مافيش قصة تبدأ بين إتنين تخلوا من هؤلاء الأبطال ,
الانجذاب هو أول بطل سنخبركم عنه يبدأ كل طرف بالانتباه لوجود الطرف الآخر، لشكله المميز أو لحضوره مع الناس أو لتصرف معين. يبدأ بعدها دور النظرة : وهى تأكيد رؤية الشخص وتميزه عن ما حوله، ثم تأتى بطلتنا الابتسامة: وهى لغة غير مباشره للتواصل مع الطرف الآخر بشكل راقى، ولو لاحظنا شوية هنلاقى الابتسامة زى اللايك بتاع الفيس بوك ملوش لازمة بس يأكد أنك مهتم، بعدها تدخل بدوره.
الكلمة: صباح الخير. مساء الخير.. لو ممكن .. لو تسمح، وهكذا مجرد كلمة لبدء حوار بعدها يأتى دور التعارف: أنا فلان وأنا فلانة وهكذا يبدأ كل طرف بتقديم نفسه بشكل شيك جداً راقى أوى ويجوز قليل من المدح فى النفس ليأتى حب الذات علشان الجملتين دول بتوع المدح هى اللى هتقدم بطللنا اللى بعد كدة، وهو الإعجاب: كل واحد يبدأ يشوف فى التانى أجمل ما فيه من صفات يهتم بحديث الناس عن الشخص لو كان محبوب كل ده بيزيد من الإعجاب به، ندخل بعد كدة فى مرحلة الانبهار: خلاص كل طرف ركز أوى مع التانى وشاف تصرفاته مع نفسه ومع الناس وكلام الناس عنه وحصل الانبهار به، والخطوة دى مهمة أوى لأنى دى اللى بتخليهم مركزين فى تصرفات بعض أوى وبعدها بنوصل لبطلنا الهمام الارتياح: خطر أوى البطل ده لما بنبدأ ناخد على بعض شوية شوية بتلاقينا بنفضفض الأول بنتجمل بسيط بعد كدة تلاقينا بنحكى عن أدق تفاصيل فى حياتنا عن مشاكلنا.. أحلامنا.. أسرتنا.. أخوتنا.. أهم الناس فى حياتنا وكل طرف يفضفض لحد ما يصدع التانى، الحالة دى بتخلى فى خصوصية شوية بين الطرفين بمأنهم هما الاتنين بقوا حقيبة أسرار بعض فأكيد مش هيقدروا ميكملوش باقى أحداث الموضوعات اللى فتحوها مع بعض ولا إيه؟، والحكاية دى بتخلى كل طرف يعلى درجتين تلاتة عند التانى معزة بعدها يأتى دور التعود: خلاص مبقاش حد فاهمنى غيرك، وأنت مبقاش حد فاهمنى غيرك وهكذا ونبدأ بقى كل مشوار مع بعض وكل خروجه لحد ما الأماكن كلها بقت شاهدة علينا، نزعل شوية وشوية نتصالح وخلاص أصبح التعود شىء روتينى زى الأكل والشرب لا يمكن الابتعاد عنه، ومن هنا يقدر يقول أى طرف فيهم "أنا بحب" بقلب جامد، الحب: تواصل الأرواح.. انسجام الشخصيات.. النبض المتتالى.. السعادة باللقاء.. اللذة فى العذاب.. الغيرة.. الاهتمام الزايد.. الامتلاك خلاص بقينا بتوع بعض، نبدأ بقى بالوعود والأحلام واللمون بالنعناع.. والتنهيد والشوق والسهر ونعد النجوم ونشتكى للقمر وبينفصلوا الطرفين عن العالم وبيعيشوا فى عالم خاص بيهم هما وبس.
مكنش ينفع دور بطل يأخده دور بطل آخر يعنى مينفعش تكون الابتسامة قبل النظرة والارتياح قبل الإعجاب والحب قبل التعود علشان كدة أنا مش مؤمنة نهائى بفلسفة الحب من أول نظرة.
وتنتهى قصتنا بسؤال نسينا جوابه.. هو إحنا إزاى حبينا؟
انتهى.