كنيسة العذراء .. !!

أودى وشى من إخوانا النصارى فين ؟
واشكى لمين بلوتى وأوصف أسايا لمين ؟
عملولنا إيه النصارى عشان نروعهم ؟
وامتى يا مسلمين القتل كان فى الدين ؟
...
مش مسلمين اللى رفعوا فى وشنا سلاحهم
ولا مسلمين اللى صابوا الناس فى أرواحهم
ولا مسلمين اللى حرقوا كنائس الأقباط
وجاروا على أرضهم وسرقوا أموالهم
...
مش مسلم اللى بغبائه خان حقوق الجار
ولا مسلم اللى يقول إن القبط كفار
ولا مسلم اللى يمشى فى سكة الإرهاب
ولا مسلم اللى يولع فى الكنايس نار
...
الدين محبة ما بين المسلمين والناس
فيه الوداد والسماحة لكافة الأجناس
عايزين نطهر قلوب المسلمين تانى
ونطرد الغطرسة والحقد والوسواس
...
يا (كنيسة العذراء) جميع المسلمين أسفين
لا الشر من طبعنا ولا من أصول الدين
ووعد مع بعضنا نقضى على الإرهاب
وصدقينى اللى جرحوا فرحتك خاينين
...