بتقولى ابنك؟!

بتقولى ابنك....؟!
كلمه دايما ً بتقوليها...؟!
كلمه بتذلينى بيها
الأمومه مش كلام
أو نشيد وطنى وسلام
الأمومه انسجام
عدل واضح واهتمام
مش تبيعى
قلب من يومه شاريكى
الأمومه لمَّا أمرض
ألقى كل علاجى فيكى
لمَّا أضعف
ألقى ضهرى اتشد بيكى
لمَّا أبعد
ألقى روحى تحن ليكى
لمَّا ابنك....!!!!
طاب أنتى ليه مش حاسه بيّا
طاب أنتى ليه قاسيه عليه؟!
رغم خيرك ماشى حافى
وليه كمان رابطه عينيه
والقيود ماسكه ف إيديه؟!
بازقى وردك
عز بردك
بعتى حتى خيوط لحافى
وتقولى ابنى جوا قلبى
والهدمه مش ساتره كتافى
ابنك........
كلمه بتذلينى بيها
دا اللقمه فيكى مش لاقيها
ابنك ..... ابنك اللى
مات عشانك
راح ضحيه
واللى شانك واللى خانك
واللى ذلك واللى هانك
قاعده تديه ف الماهيه
والمكانه الأوباهيه
واحنا بنشيل ف الأذيه
يضربونا البلطجيه
وثورة تبقى مهلبيه
نفس الحكايه هيه هيه
كومبارس دورى ف تمثيليه
نفس السيناريو والحوار
وتقولى ابنك يا بهيه
لسه ابنك
ع القهاوى
برضه عاطل
واللى كان ينهب وباطل
هلسه فى الأحكام يماطل
وبجراءه
اللصوص تطلع براءه
واحنا نلبس ف القضيه
هيه هيه
بتقولى ابنك.!!!!!!!!
وتقولى قلبى يا ناس عليه
لمَّا ابنك؟!
سايبانى أرضع ذل ليه؟!
ولمَّا أحلم أبقى حاجه
يقولوا قطر الحلم عد َّى
ولا َّ أصبح كومبليه
لمَّا أحلم
أبقى ظابط ولا َّ قاضى
يقولوا أصلك يبقى إيه
وتبقى زى ولادنا كيه
ذنبى إنى ابوى فقير
بياع خضار ولا َّ فطير
بس قرشه من حلال
مات شهيد فوق الكنال
لجل أنت تعيش يا بيه
لما ابنك تظلمينى
بس ليه
بتقولى ابنك....؟!
كلمة دايما ً بتقوليها...؟!
كلمه بتذلينى بيها
ابنك انتى
اللى باشا
اللى ياكل فى المغاشه
اللى رافض أبقى زيٌّه
ممنوع عليَّا
أسكن فى حيُّه
ويقوللى أنت فقير وبيئه
واحنا ناس بعيون جريئه
والرشاوى عينى عينك
والقانون بينى وبينك
يمضى إنى شخص لائق
وف ذكائى برضه فائق
بس فقره يبقى عائق
للوظيفه الحلوه ديَّه
ذنبى إنى أبوى فقير
بس راجل فيه ضمير
فقرنا دا رمز عارك
وبشعارك
الشهاده الفقراويه
بتختميها
بتقولى ابنك....؟!
كلمة دايما ً بتقوليها...؟!
كلمه بتذلينى بيها
لمَّا ابنك
ليه تهينى ليا عِرضى
ولمَّا أطلب حق فرضى
ولا َّ أرضى
غصب عنى بتبيعيها
لمَّا ابنك
ليه تخلى شهد عمرى
يبقى مر؟!
ازاى يا أمى
كاره ابنك يبقى حر؟!!
ليه بنشحت ف الرغيف
واللى بايت ع الرصيف
ثوره قعدت ولا َّ قامت
ثوره صحيت ولا َّ نامت
ثوره غرقت ولا ّ عامت
الحكايه هيه هيه
الجراح مش منتهيه
لمَّا ابنك
عن حنانك
ليه بتقسى
وتبعدينى
تعذبينى
وتبيعينى
تهجَّرينى
تأجرينى
وتغربينى
من كيعانى تشربينى
وتموتينى ف القطار
جثه حريق
وف البحار باصبح غريق
ورافضه إنى جثتى
جنب أهلى تدفينيها
بتقولى ابنك....؟!
كلمة دايما ً بتقوليها...؟!
كلمه بتذلينى بيها
بس برضه
انتى أمى
وانا قلبى بيكى اتعلَّق
وانا لسه جنين بتخلَّق
ومكتوب عليَّا
أنا بِرك
ولو موجه تعلا
أكون بَرك
والعتاب دا كان محبه
ولو بتقسى عليا حبه
انتى امى أمى
وعمر قلبى مايشانيها
وشئ يشرفنى تقوليها