شيلوا وحطوا

شيلوا حكومة حُطوا حكومة
حاجه غريبة ومش مفهومة
الموضوع مش بس ومين
بحر فساد من عمر سنين
خلاه حسنى صار منظومة
**
شيلوا وزير وحطوا وزير
وضع حقيقى بجد خطير
الموضوع مش واحد فرد
ألف قانون محتاج للجرد
ألف قانون محتاج تغيير
مصر واكلها روتين وبارومة
**
شيلوا وحطوا علينا تراب
تلاتين عام مزروعة خراب
قاعدين بس نشيل ونحط
لعبة فار ولعبة قط
خايفين يبقى الحلم سراب
نلقى الشنطة كمان مخرومة
**
شيلوا سوسن حُطوا حنان
هاتوا فلان أو مين عِلان
لينا سنين بنشيل ونغيَّر
حاجه بجد حقيقى تحيَّر
خايفين بكرا يجينا جنان
وتعيش تانى بلادى محرومة
**
شيلوا وحطوا علينا وهاتوا
اللى سرقوا بلادى ما ماتوا
خلوا دخل بلدنا رصيدهم
قالوا علينا احنا عبيدهم
داسوا علينا وعدُّوا وفاتوا
خلوا بلدنا يا ناس معدومة
**
شيلوا وزارة حطوا وزارة
ياما انفقعت لينا مرارة
الموضوع مش فى الأشخاص
مين المخلص مين هجَّاص؟!
عايزين عِلْم وفن إدارة
عايزين خطة تكون مرسومة
**
تمشى وجوه وبتيجى وجوه
تلاتين عام ماشين بنتوه
شالوا وحطوا علينا الطين
عز البرد خدوا البطاطين
غَمُّوا الشعب كمان خمَّوه
وخلوا عزيمته معاه مهزومة
**
قبل وزارة أو تعديل
أى قانون عايز تفعيل
عايزين يصحى ضميرنا يفوق
تصبح بلدى ربيع وشروق
عايزين صورة تبقى دليل
مش عايزين شعارات مزعومة
**
شيلوا وزارة حطوا وزارة
راسنا يا ناس صارت مندارة
تلاتين عام قاعدين نستنَّى
إمتى بلادى يا ناس تتهنَّى؟!
وترجع تانى أحلى منارة
دايما ًمصر يا ناس مظلومة
**
شيلوا حكومة حُطوا حكومة
حاجه غريبة ومش مفهومة