شيلوا وحطوا

شيلوا حكومه حُطوا حكومه
حاجه غريبه ومش مفهومه
الموضوع مش بس ومين
بحر فساد من عمر سنين
خلاه حسنى صار منظومه
**
شيلوا وزير وحطوا وزير
وضع حقيقى بجد خطير
الموضوع مش واحد فرد
ألف قانون محتاج للجرد
ألف قانون محتاج تغيير
مصر واكلها روتين وبارومه
**
شيلوا وحطوا علينا تراب
تلاتين عام مزروعه خراب
قاعدين بس نشيل ونحط
لعبة فار ولعبة قط
خايفين يبقى الحلم سراب
نلقى الشنطه كمان مخرومه
**
شيلوا سوسن حُطوا حنان
هاتوا فلان أو مين عِلان
لينا سنين بنشيل ونغيَّر
حاجه بجد حقيقى تحيَّر
خايفين بكرا يجينا جنان
وتعيش تانى بلادى محرومه
**
شيلوا وحطوا علينا وهاتوا
اللى سرقوا بلادى ماماتوا
خلوا دخل بلدنا رصيدهم
قالوا علينا احنا عبيدهم
داسوا علينا وعدُّوا وفاتوا
خلوا بلدنا يا ناس معدومه
**
شيلوا وزاره حطوا وزاره
ياما انفقعت لينا مراره
الموضوع مش ف الأشخاص
مين المخلص مين هجَّاص؟!
عايزين عِلْم وفن إداره
عايزين خطه تكون مرسومه
**
تمشى وجوه وبتيجى وجوه
تلاتين عام ماشين بنتوه
شالوا وحطوا علينا الطين
عز البرد خدوا البطاطين
غَمُّوا الشعب كمان خمَّوه
وخلوا عزيمته معاه مهزومه
**
قبل وزاره أو تعديل
أى قانون عايز تفعيل
عايزين يصحى ضميرنا يفوق
تصبح بلدى ربيع وشروق
عايزين صوره تبقى دليل
مش عايزين شعارات مزعومه
**
شيلوا وزاره حطوا وزاره
راسنا يا ناس صارت منداره
تلاتين عام قاعدين نستنَّى
إمتى بلادى يا ناس تتهنَّى؟!
وترجع تانى أحلى مناره
دايما ًمصر يا ناس مظلومه
**
شيلوا حكومه حُطوا حكومه
حاجه غريبه ومش مفهومه
سوهاج – طهطا = عرب بخواج
أرسل مقالك للنشر هنا وتجنب ما يجرح المشاعر والمقدسات والآداب العامة
page2almesryoon@yahoo.com