#شجع_مصر_تكسب.. حملة جماهيرية لتشجيع الفراعنة في الجابون

شجع مصر تكسب.. شجع مصر توصل لحلمها.. الحلم اللي بقالها 7 سنين بعيدة عنه... حلم بطولة كأس الأمم الأفريقية. منتخب الفراعنة بيستعد للمشاركة في بطولة كأس الأمم الأفريقية بالجابون من 14 يناير في الظهور الأول للفراعنة منذ التتويج الأخير بالبطولة في 2010، مش مهم أهلي ولا زمالك دلوقتي.. كلنا ورا المنتخب..
وعشان بطولة أفريقيا، والأعلام في الشوارع، والتجمع قبل كل ماتش عشان نروح الاستاد وحشنا.. انتشر هاشتاج #شجع_مصر_تكسب اللي جمع شمل كل المصريين عشان يدعموا منتخبهم ويقفوا في ضهره، واللي بيشارك فيه الشباب المؤثر على مواقع التواصل الاجتماعي... الهاشتاج هو حملة لسه لم يتضح مصدرها أو مين وراها وأكيد هنتكتشفها خلال أيام، لكن تشجيع المصريين للمنتخب ابتدا بالفعل ومش مستني.
في 2006 الحلم كان لسة بيبتدي.. شوفنا حسن شحاتة وهو بيحول فريق الشباب المونديالي لواحد من أعظم منتخبات مصر عبر التاريخ.. عملنا حفلة على كوت ديفوار وكملناها مع ليبيا.. والحظ عاندنا قدام المغرب.. لكننا كملنا لحد ما شيلنا الكاس في النهائي.. خرجنا في الشوارع واحتفلنا لحد الصبح محدش فينا كان اهلاوي ولا زملكاوي كلنا نزلنا بعلم مصر.
وفي 2008.. البرد ماممنعناش من النزول للشوارع بنفس العلم عشان نحتفل بالفوز على كوت ديفوار بالأربعة.. وكنا على أعصابنا قدام الشاشة لحد ما زيدان خطف الكورة من سونج واداها لأبو تريكة اللي جاب جول فرح بيه ال70 مليون مصري..
تابعنا معجزة جدو في 2010 اللي كان مفاجأة البطولة وقتها بأهدافه الحاسمة.. وكملها بفرحتنا الكبيرة بالجول القاتل في غانا بعد ما عملوا كل حاجة عشان يحرمونا من اللقب التالت على التوالي.. لكن لاعيبتنا كانت على قدر المسئولية وثقتنا الكبيرة فيهم وفزنا باللقب الثالث علي التوالي..
7 سنين واحنا محرومين من الأحاسيس دي.. مكانش بيهمنا من اللي هيكسبنا أهلاوي أو زملكاوي مش فارقة.. المهم نكسب ونحتفل كلنا مع بعض.
7 سنين بنينا فيهم فريق جديد واتولدت نجوم بقوا كبار ومستعدين يرجعولنا الذكريات الحلوة دي.. الكورة بالنسبة لنا مش مجرد لعبة.. الكورة هي حياتنا من يوم ماوعينا عليها زي ما شجعنا الخطيب وحسن شحاتة والجوهري وحسام حسن والحضري وحازم إمام وتريكة.. هنشجع صلاح والنني وعبدالله وعبد الشافي وطارق حامد في أمم أفريقيا..
شجع مصر وشاركنا ذكرياتك مع الفراعنة على هاشتاج #شجع_مصر_تكسب.