من السيسي إلى تميم.. ابعد أحسن ما تندم يا جميل !

علمت وكالة هريدي نيوز أن اللهو الخفي اللي اسمه الدكتور راشد اللي كل اللي اتمسكوا من جماعة الإرهاب بيأكدوا أن هو اللي بيعطي لهم التعليمات، أصبح هذا اللهو الخفي الآن معروفا ومعلوما علم اليقين لدي المخابرات المصرية اللي عرفته من خلال فك شفرات رسالة كانت موجودة على جهاز اللاب توب بتاع واحد من المقبوض عليهم اللي شايل كل أسراره على الجهاز وقال مكتفي ب"باسوورد" للجهاز فعلا ابن ناصحه، المهم أن عفريت العلبة اللي اسمه الدكتور راشد ده طلع «زياد الإمام» مدير العمليات السرية لأمن دولة قطر، والملقب باسم «أبو فادي».
يقول محرر الوكالة: إن المعلومات دي لما وصلت للفريق أول عبدالفتاح السيسي وشه أحمر وانفعل وراح كاتب رسالة من كام كلمة لأمير قطر "تميم"، وعلى فكرة تميم ده حبس أبوه زي ما أبوه حبس جده بالظبط.
أضاف المحرر: أن خطاب السيسي لتميم حسب مصدرنا الفشار كان كلمتين وبس قال له فيهم أبعد عن الإخوان وإلا فإن صواريخ مصر الباليستيه ستضرب أعماق قطر ووقتها مش هاينفعك لا أمريكا ولا إسرائيل وستتحول قصور الإمارة لديك إلى أكوام من الركام أو زي ما تقول كده أكوام تراب.
أكد محرر الوكالة: أنه طبقا لمعلومات واردة من مندوب الوكالة الفشار في قصور أمراء قطر، أن تميم أطلق النفير العام وطلب الحكماء لدراسة خطاب الجنرال المصري، في النهاية طلع بمعلومة واحدة وهى أن أمريكا شالت إيدها عن الإخوان وده معناه أنهم انتهوا يبئى لازم الدكتور راشد يبعد هو كمان!