"إنجيل مع توراة".. شعر محمد عاطف

يا كليم الله على جبل الطور
لسه البحر فاكر شكل عصاك
لساه فاكر آخرة فرعون
والحبل اللى بيتحول تعبان
والخلق اللى بتسجد من خوفها
لواحد كان م المولى جبان
وصلت رسالتك توراتك
من مصر لباقى البلدان
يا حبيب الكل
يا رسول النور
يا ابن العذرا
مرسوم عل الإيد
مصلوب تناهيد
ينزل دمعك ممزوج بالدم
عناقيد عناقيد
يروى الأرض بريحة الدين
تلاميذك لسه في وسطينا
بيبادلوا صلاتك ترانيمك
بيبادلوا خشوعك إنجيلك
في البيت عايشين
لسه مباركين يا رسول النور
قرآن سنه
ورسول يختم رسالات الله
صادق وأمين
محبوب من كل البنى آدمين
بيورينا إزاى نبقى عايشين صالحين
ولا نجرى ورا الضل المخفى اللى اسمه حياه
وصى على مصر في أحاديثه
كان عاشق ليها ولولادها
يرسل قواد حمله وجيشه
كان نفسه يشوفها ويفتحها
ويعز الدين بجنود أحرار
بجنود بحياتهم بيضحوا
ويعيش دين ربى الجبار
من الآخر يا أساتذه بلادى
مذكوره في كل كتاب لله
متباركه في إنجيل مع توراه
موجوده في قرآن محفوظ
إزاى بتقولوا في يوم هتضيع
إزاى بتحاولوا تعادوا الدين
الأعلى مبارك أوطانه
إزاى هتروح بلد الأديان
والمولى أمين
طب تبت يدا كل جبان
بيحاول يوم يهدم فيها
أو يعمل فرق في وسطيها
يبعدنا وياخد أراضيها
هيجيلوا اليوم ويموت فيها
ما هي بلد الدين
متشاله أمانه مع المولى
والمولى أمين