سموها فيفى

الإخوان وأنصارهم يطلقون على 30/6/2013 انقلاب "فاجر"، والنخبة "المايعة" يطلقون عليه انقلاب ناعم زيهم، وحزب الكنبة يطلق عليه ثورة جديدة، وشباب ثورة 25 يناير يطلقون عليه "كمالة" ثورتهم والنخبة السياسية يطلقون عليها الموجه الثانية من الثورة الأولى والفلول يطلقون عليها رد اعتبار .. وأنا رأيي طالما الكل مختلف على الاسم نسميه فيفي ونخلص .. تركنا كل الإخفاقات والأزمات التي مرت بها مصر خلال الأعوام السابقة واختلفنا على اسم 30 /6 .. هل هذا اختلاف أم تخلف متعمد ولا سذاجة متوراثة ولا افتقاد لتحديد أولوياتنا ولا إصرار على عدم التغيير، فإذا كانت فيفي محيراكوا فاتركوا الاسم واشتغلوا بحلول وقتية وكفاكم تصريحات وأقوال وصفصطة ليس لها أي جدوى وكفاكم تباطؤا بلون التواطؤ لأن الشعب الآن ضاق خلقه وهو على وشك نفاد رصيده من الصبر .. أيها المتصارعون كفاكم فشلا فقد آن الأوان أن نرى رجالا يحققون أي نجاح إن شاء الله حتى في امتحانات سلاح التلميذ فقد مر أكثر من شهر على انتهاء فيفي ومازلتم تتحدثون عن اسمها أمال هتعملوا إيه في اللي جاي .. ربنا يستر عليكي يا بلدي .
- شاهدت الأستاذة عزة الجرف، الشهيرة بأم أيمن والتي كانت عضو مجلس شعب عن الإخوان وواحدة من الذي شاركوا في كتابة دستور العجلة، تدور وقد تجلت علينا بالابتسامة الإخوانية المستفذة وهي تنكر القتل والسحل والتعذيب وتتوعدنا برجوع مرسي بناءً على رغبة 45 مليون إخواني وشبه إخواني.. ليس لدي أي تعليق على امرأة قالت عن نفسها بتواضع إنها زعيمة المرأة الإسلامية في الدول العربية، إلا أنني أطلب منها أن تغير الكارير بتاعها وتعمل فرشة في رابعة وتبيع جرجير وفجل وده طبعا لو بائعات الجرجير قبلن هذا.. وإنني لا أحقر من هذه المهنة الشريفة فهي مهنة لها مني كل احترام وتقدير ولكنني لا أقبل أن تكون سيدة هاربة ومستعرة من مهنتها الأساسية وهي بيع الفجل والجرجير وتبقى زعيمة وفي غفلة من الزمن تشرع لي قوانين وتكتبلي دستوري بالشبت والبقدونس .
- بعد أن نجح الدكتور محمد مرسي في سنة واحدة، في القضاء على الإخوان بينما فشل الملك وناصر والسادات ومبارك وطنطاوي في القضاء عليهم طوال 80 سنة، وبعدما نجح أيضا في عودة الود والحب بين الشعب المصري والشرطة .. أقترح تولي الدكتور مرسي رئاسة اتحاد الكرة للقضاء على ظاهرة الألتراس في أسبوع وأيضا في تصالح جماهير الأهلي والمصري في يومين وذلك للتخلص السريع من مرسي كلاكيت تاني مرة .
- حوار المصالحة الوطنية، بيفكرني بواحد يتعرف على واحدة هي متعرفوش وراح لواحد عايز يتجوز نفس الواحدة بس هي ما بتطقوش والاثنين قاعدين مع بعض بيتخانقوا عليها وبيملوا شروطهم العبيطة، طيب أحب أؤكد لسيادتكم أن العروس اللي هي مصر أم الدنيا ما تعرفش تتحدث بلسانها ومش طايقة اللي عايز يتجوزها بالعافية وبتقولكم اصمتوا صمت الخرفان .
- سمعت مناشدة البلطاجي للأمم المتحدة ومجلس الأمن والصليب الأحمر والهلال الأحمر والنادي الأهلي الأحمر بالمرة، وهو يقول أنقذونا نتعرض للإبادة .. والله يأخ يا محيرني أنا مش فاهم مشكلتك إيه بالظبط ليه حاسس إنك حشرة وإن شركة الرش هاتبيدك، ثم مش عيب تلجأ للخارج ضد الرش الداخلي .. فعلاً وطني ..أنا الوحيد إللي عارف إن مشكلتك مش السجن لأنك رد سجون ومتعود عليه مشكلتك الحقيقية هو أن نخنوخ مستنيك في السجن .. يابختك ياعم؟.
- سمعت تصريحات الأستاذ أحمد، ربنا ما يجعله عامر وهو يطالب معتصمي رابعة بحرق العلم المصري واستبداله بعلم القاعدة .. طيب يأخي وإحنا مالنا ثم إنت عايز إيه من مصر لما بلدكم هي القاعدة روح دور على قاعدة تانية خارج مصر بس خلي بالك ياللي إنتا مش عامر أمريكا باعتكوا وبتدور على خرفان تانيين لأنكم ما سمعتوش كلامي لما قلتلكم إللي متخطي بالأمريكان .. عصام .. عريان .. وابقى اتخطى بقى بعلم القاعدة .
- سمعت أبو وأم لمعة "صفوت حجازي" وهو يهدد الشرطة وبيقول لوزيرها لو راجل صحيح وبتشرب بيرل تعالى رابعة .. ربنا يمد في عمري أسبوع لحد ما أشوفك مقبوض عليك يادكر ومش بعيد في التو هتغير شعارك اللي إنت قارفنا بيه من إسلامية إسلامية رغم أنف العلمانية إلى .....
داخلية داخلية رغم أنف الإخوانجية ...
مش بعيد عليك يا نتاش.