أكرم حسني يكشف رد فعل محمد منير حينما عرض عليه أغنية للي | فيديو

تحدث الفنان أكرم حسني خلال مداخلة هاتفية له على فضائية dmc، عن إحساسه خلال تأليف أغنية للنجم محمد منير، واصفا شعوره بأنه يجمع بين المسئولية والخوف من الكتابة لفنان بحجم محمد منير قائلا: "ده مش أي حد ده الكينج محمد منير، وأنا من أول ألبوم له وأنا كنت باخد الفلوس اشتري الشرايط بتاعته وحافظ ترتيب الأغاني والعام اللي نزل فيه الشريط وكل التفاصيل، فكل ده كان بيعدي قدامي وأنا بكتب وأنا مرعوب مسئولية كبيرة".
وأضاف:" حينما ذهبت له بكلمات الأغنية محستوش اتبسط وأنا بكتب كنت بقول مش منير، لكنه بعد أسبوع تواصل معي وسألني عملت إيه قلت له أنا مش عارف اعمل حاجة تليق بيك، ولكن أحيانا بتيجي لي أفكار مش كوميدية ومش لايت وكنت بألف أغنيات للإعلانات والبرامج اللي بشتغل عليها جت لي فكرة للي وأنا بكتبها عندي إحساس إن المفردات دي لمنير، وكلمته ورحت له وسمعته الكلام وفرح وقالي أنا هسجل الأغنية دي وقد كان".
واتهم الشاعر عادل صابر، الفنان أكرم حسنى، بسرقة كلمات أغنية الجديدة "للّى" للكينج محمد منير، وقرر الأول اتخاذ الإجراءات القانونية ضد أكرم حسنى واللجوء للقضاء.
رد أكرم حسني
و رد أكرم حسني عبر حسابه الشخصي بموقع التواصل الاجتماعي «فيس بوك» وقال: قريت من شوية بوست بيتهمني بسرقة كلمات اغنية "للي" من شاعر من جنوب مصر الحبيب، وبعدها اكتر من صحفي كلمني بيطلب مني رد على الاتهام ده.. ف خلوني أوضح كذا نقطة:
1 - كل الحب والاحترام والتقدير لكل موهبة فنية بتقدم فن يحترم الجمهور وجنوب مصر خرجلنا شعراء وأدباء كتير على رأسهم الخال الأبنودي رحمة الله عليه.
2 - أؤمن بحقوق الملكية الفكرية كما أؤمن بأن السرقة الفنية تصنع نجاحا مؤقتا
3 - تشابه جملة من الأغنية التي تتكون من 12 بيتا مع جملة للشاعر لا يعني السرقة وإنما توارد الأفكار أمر طبيعي.
4 - لما كتبت الأغنية كانت مكونة من 20 بيت اختار منهم الكينج 12 بيتا وتم تسجيلهم فمعتقدتش اللي كتب 20 بيت هتقف معاه في جملة عشان يسرقها.
5 - أنا بكتب أغاني بقالي اكتر من 8 سنين من خلال برامج ومسلسلات وأعمال فنية قدمتها وكنت على سبيل المثال في أغاني برنامج ابو حفيظة قبل ما استخدم لحن أي أغنية في البرنامج برجع لجمعية المؤلفين والملحنين وأسدد الرسوم حفظا لأصحاب حقوق الملكية الفكرية.. ف اللي يعمل كده بيتهيألي صعب يحط نفسه في موقف زي ده.
6- انا مهنتي الأساسية ممثل وبحب صناعة الأغاني من باب الهواية ف أنا مش محتاج أسرق عشان اعمل رصيد لنفسي كشاعر.. انا بعمل ده بحب.
واختتم أكرم حسني ب: اخيرا.. انا كتبت البوست ده مش دفاعا عن نفسي ولكن لاحترامي للجمهور المحترم اللي بيثق فيا ف حبيت اوضح له.
تعاون الكينج وأكرم حسني
ويأتي تعاون محمد منير مع أكرم حسنى، بعد تواصل الكينج مع أكرم منذ سنوات لمعرفة كاتب أغاني برنامجه "أبو حفيظة"، وتفاجأ عندما عرف أنّها من كلمات أكرم نفسه.