نادية الجندي تكشف عن فنانة غارت منها على زوجها وتسببت في طلاقها | فيديو

قالت الفنانة نادية الجندي: "فيه فنانات كتير كانوا بيغيروا مني، ومرة كنت بصوَّر فيلم خارج مصر وكان معايا نجم بيمثل معايا وهو كان لسه متجوز جديد عن قصة حب من فنانة، وبعدين حصل مشكلة ومراته صممت أنه ميسافرش يصور معايا".

أزمة إحدى الفنانات مع نادية الجندي
وتابعت خلال الجزء الثاني من لقائها ببرنامج "كلام الناس" المذاع على قناة "إم بي سي مصر": "كنت مسافرة ومعايا زوجي المنتج محمد مختار ولكن زوجة النجم صممت أنه ميسافرش يصور الفيلم معايا وكان موقف غريب جدا وغارت على جوزها، قالت: له متروحش مع نادية الجندي، فقال لها: الست متجوزة ومعاها جوزها ولكنها صممت على رأيها".
واقعة طلاق بسبب نادية الجندي
وأضافت: "مشكلة النجم اللي كان بيصور معايا الفيلم جاء معايا وكمل شغله ولقيناه مضطرب جدا وكل يوم هي بتكلمه من مصر بتتخانق معاه وهو بقى في حالة نفسية وحشة جدا بقينا مستغربين ليه هو عصبي ومش عارف يركز في الشغل، وبعد كده فهمنا أن حصل طلاق واتطلقوا وهي كانت بتغير عليه جدا".
وكشفت الفنانة نادية الجندي، خلال الجزء الأول من نفس اللقاء، حكاية الرواية التي حكاها الزعيم عادل إمام، بعد وقف فيلم "5 باب" من العرض في دور السينما: "فضلت ترش ملح؛ خوفًا من الحسد لحد لما الفيلم نزل واتوقف".

تعرض فيلم "5 باب" للحسد
وأوضحت نادية الجندي ضاحكة: "لأ مش طبعًا مش زي قال عادل إمام، متوقفش من الحسد، ولكن فيلم "5 باب" اتوقف بفعل فاعل".

خطة كيدية
وأضافت: "الحسد في فيلم "5 باب" حاجة تانية خالص لها علاقة بحاجة كيدية مدبرة علشان يتمنع الفيلم من دور العرض، وإزاي عادل إمام ونادية الجندي وفؤاد المهندس يجتمعوا في عمل واحد".

تدخل وزير الثقافة لوقف الفيلم
وأكدت: "الفيلم كان اتعرض 10 أيام في دور العرض والأمن المركزي نزل في ميدان الأوبرا من الخوف لأن كان هيحصل ثورة على الفيلم من الزحام والجماهير لأنه كان مكسَّر الدنيا، وبعد ما نشوف نجاح العمل لقينا وزير الثقافة وقتها راح مضلم الدنيا، وده تعبني نفسيا وقتها قلت مش هشتغل تاني خلاص ومش همثل تاني".
أزمة نفسية لنادية الجندي
وتابعت: "تعبت نفسيًّا لما الفيلم اتوقف وقلت مش همثل تاني لأن دي قضية كرامة وفيه ظلم وقع عليا بوقفه من العرض، إزاي أكون أخدت 5 تصريحات من الرقابة ومشيت في الطريق القانوني ويجي وزير الثقافة وقتها يمنعه علشان كده قررت وقتها اعتزال التمثيل".

عودة نادية الجندي بفيلم الخادمة
ولفتت: "المخرج أشرف فهمي كان جايبلي فيلم "الخادمة" قلت له مش هشتغل تاني خالص بعد وقف "5 باب" وهبطل تمثيل، فقاللى إنتى أفلام وتاريخ ومتخليش حدث زي ده يوقف مسيرتك وحفزني إنى أرجع تاني وفعلًا نزلت صورت "الخادمة" وكسَّر الدنيا وحقق نجاح محصلش على المستوى الجماهيري والنقاد".

مسلسل سكر زيادة
وأشارت: "اللى حمسني أعمل "سكر زيادة" مع نبيلة عبيد أن العمل كوميدي ومختلف، وفيه كمان النجمة العظيمة سميحة أيوب، وقلت فكرة جديدة، وكل القنوات العربية اشترته بأعلى سعر، وحقق نجاحا ماليا كبيرا للمنتج".
نادية الجندي تكشف سر فشل ظهور مسلسلها عن تحية كاريوكا | فيديو
نادية الجندي: عادل إمام الوحيد اللي نافسني في السينما | فيديو
خلاف نبيلة عبيد
وعن خلافها القديم مع نبيلة عبيد، علقت نادية الجندي: "أنا مش بشيل في قلبي حاجة وحشة وبسامح، حتى لو كان فيه خلاف ما مع نبيلة عبيد زمان، ومعنديش مشكلة وبسامح".