موجوعة وجزء مني مقطوع.. ليلى غفران تتحدث عن سبب ابتعادها عن الساحة الفنية |فيديو

كشفت المطربة ليلى غفران خلال لقائها في برنامج "وشوشة" المذاع على فضائية النهار، عن سر غيابها عن الساحة الفنية طوال هذه الفترة، قائلة: "السنتين اللي ظهر فيهم فيروس كورونا اختفيت لأني كنت ملتزمة بالحجر المنزلي لأني شخصية بتخاف جدا وهذا فيروس خطير".
وتابعت: "لكني قبل كدة كانت حالة نفسية بعيشها مكنتش تسمح إني أكون موجودة، كنت حاسة إني موجوعة ومقطوع مني حتة، وتعبانة وحاسة بإحساس التبلد مش قادرة كل ما أحب أخد خطوة ألاقي نفسي برجع وأعمل stop".
وفي سياق متصل قالت خلال لقائها ببرنامج "كلام الناس" المذاع على قناة "إم بي سي مصر": "أصبت بجلطة في المخ تسببت في تعرضي لشلل كامل، وعانيت كثيرًا من الناحية الصحية، ودخلت في غيبوبة".
دخول ليلى غفران في غيبوبة
وتابعت: "لما فوقت من الغيبوبة حسيت إن ربنا بيقولي قومي بقى وكملي المسيرة بتاعتك، والحمد لله قمت وابتديت اشتغل وأعمل حاجات".
آثار الإصابة بجلطة المخ
ولفتت:" جلطة المخ اللي اتعرضت لها جت من تراكمات كتير جوايا، وأنا من النوع اللي مبيعرفش أغضب ولا أطلع اللي جوايا وأسامح، ونمت زعلانة، ومن كتر الزعل صحيت جالي جلطة، ودخلت في غيبوبة، واتحجزت في المستشفى لأني مكنتش بتحرك، والجلطة خلتني حاسة كأني طفلة وبيتهيألي حاجات كتير من كمية الأدوية اللي كنت باخدها، وبقيت أشوف حاجات غريبة وبقيت اتصرف تصرفات أطفال".
وقالت الفنانة ليلى غفران في نفس اللقاء: "كان نفسي أجيب عيال من غير جواز لأن كل زيجاتي غير موفقة، وعلشان أنا طيبة زيادة عن اللزوم مكنش فيه نجاح لزيجاتي".
تعرض ليلى غفران للخيانة
وتابعت: "خلال زيجاتي مكنتش بحب الغلط وكنت اتغاضى مرة واتنين ولكن بعد كده مبسكتش وتعرضت للخيانة من ورايا وشوفت بعيني كمان، وفيه خيانة سامحت ولكن مقدرتش استحمل من جوايا".
رفض ليلى غفران الزواج
وأكملت:"الجواز عاملي اكتفاء ذاتي ومش عايزة اعيش مع حد، وما زال فيه ناس بتتقدم ليا للجواز بس انا خلاص اكتفيت، وكان فيه حد متقدملي قريب بس انا عاجبني حالي لوحدي".
زيجات ليلى غفران
وأكدت ليلى غفران: "اتجوزت 5 مرات بس منهم جوازات باعتبرهم مش جوازات لأنها عدت مرور الكرام ومن كتر جوازاتي نسيت أسامي اللى اتجوزتهم، والست المغربية قادرة تتأقلم مع كل الظروف والأحوال سواء ربة منزل أو عاملة أو زوجة أو صديقة وناجحة في كل شيء".
يُعرض برنامج "كلام الناس فى رمضان" على قناة "MBC مصر" يوميا الساعة 12:00 منتصف الليل، وعرضت هذه الحلقة أمس الإثنين 18 أبريل 2022 الساعة 12:00 منتصف الليل.