شتمني بأمي ومش هسكت.. لاعب أسوان يشن هجوما على مدرب المقاولون

شن عبد العزيز موسى لاعب نادي المقاولون السابق وأسوان الحالي هجوما حادا على علاء عبد الغني المدرب العام لنادي المقاولون العرب بعد لقاء أمس الذي جمع الفريقين ببطولة الدوري.
وقال اللاعب عبر حسابه الشخصي بموقع التواصل الاجتماعي فيسبوك: "أولا بتأسف للاعبي المقاولون وكابتن رامي عادل وكابتن عبدالرحمن عيسي وأبو العلا والجهاز الطبي والاداري وكابتن عماد النحاس فقط..،
بقالي 11 او 12 سنه بالعب في الدوري لعبت في أكتر من 6 أندية عمري معملت مشكلة مع نادي أو مدرب أو لاعب وعمري حد سمع اني عملت مشكلة ولا أنا اصلا من اللعيبة بتاعت المشاكل وعمري منزلت حاجة عن مدرب أو لعيب او حاجة بس النهاردة".
وتابع: "من بداية الشوط التاني وأنا بسمع شتيمتي بودني من مدرب في المدرجات وسكت، وضغطت جامد على لاعب في نص الملعب راح كابتن علاء عبدالغني شتمني بأمي وقالي يا غلاوي سمتعها ومتكلمتش".
وأضاف: "في كورة في اخر الماتش جت في بطني جامد ومش قادر وعمال اتوجع راح شتمني تاني بأمى وقال يا غلاوي اطلع برا الصراحة مقدرتش أسكت ورحت شتموه أنا كمان معرفش مقدرتش أمسك نفسي لو كان شتمني أنا عادي لكن لما شتمني بامي مقدرتش اسكت".
وتابع اللاعب هجومه على علاء عبد الغني: "هو أصلا المدرب دا بيشتم اللعيبة وبيعمل معاها مشاكل على طول بس انت حقك تظلمني تمشيني تعاملني وحش وأنا معاك في النادي لكن انت في نادي وتعمل كده لا مش هسكتلك".
وأتم: "ممكن كنت مشدود شوية وكنت بلعب جامد النهاردة بس غصب عني محدش شاف ولا عارف أيه اللي حصل معايا من ظلم وانهم يجوا عليا سنه كاملة والشهرين الفاتوا بعد نهاية الموسم الماضي بعد ما مشيت شفت شهرين صعبين جدا عمري ما ممريت بيهم قبل كدة بسببهم وهبقي احكي كل حاجة بعدين".
وتابع حديثه: "بس في النهاية ربنا اسمه العدل مش بيضيع تعب ومجهود انسان.. وبنصح اي حد لو اتظلمت في مكان اصبر واحتسب وربنا موجود".
وختم: "لو فضلت اشكر واحمد ربنا بقيت عمري مش هوفي كرموه عليا..الحمد لله دائما وابدا".
وأحرز عبد العزيز موسى هدف أسوان والمباراة في الدقيقة الثانية بلقاء اسوان والمقاولون بعد متابعة عرضية من عمرو الحلواني والتي حولها محمود شبانة برأسه في العارضة وتابعها موسى مسجلا هدف اللقاء.
يذكر أن المقاولون تعرض للهزيمة أمام أسوان بهدف وتوقف رصيده عند 11 نقطة بينما ارتفع رصيد أسوان عند 14 نقطة.
وحقق فريق أسوان فوزه الأول تحت قيادة علاء عبد العال المدير الفني على حساب مضيفه المقاولون العرب بهدف دون رد في اللقاء الذي جمعهما أمس على ملعب المقاولون بالجبل الأخضر ضمن الجولة 14 للدوري الممتاز.
وحصد أسوان أول فوز له مع علاء عبد العال بعد 5 تعادلات متتالية أبرزها الزمالك وغزل المحلة.
وبهذه النتيجة رفع أسوان رصيده إلى 14 نقطة في المركز 12 ولديه مباراة مؤجلة مع البنك الأهلي، بينما تجمد رصيد المقاولون بقيادة عماد النحاس عند 11 نقطة في المركز 14.