يوميات رئيس.. حلقة رقم (6).. مرسي: حرمت أخطب تاني لشعب مصر

الريس منتعش ومبسوط قوي بخطابه ويروح وييجي: الله عليك ياريس وأنت ملعلع كده الشعب 3 ساعات يصفقلك هو ده الحب ولا بلاش وأنا أقول إن مبارك كان بيبقى مبسوط قوي بعد كل خطاب ليه من كتر التصفيق بس هو كان يحيب الناس دي كلها منين؟
مدير مكتبه منتعش ومبسوط: صباح الخير ياريس يا ملعلع يا اللي تعبت الشعب معاك.
الريس مبسوط: إيه رأيك كان خطاب تحفة صح؟
مدير مكتبه: فعلا بس عايزينك تمضي على الفاتوره دي بتاعة اللي كانوا بيهتفوا ويصقفوا.
الريس يحط يده في وسطه: نعم هما مش من الشعب ولا إيه.
مدير مكتبه: ياريس دول احنا متفقين معاهم على الساعة ب100جنيه وأنت أخدت 3 ساعات ودول 300 واحد يعني المطلوب 90 ألف جنيه.
الريس: ليه ليه هو ده مش وطنا كلنا.
مدير مكتبه: الكلام ده تقوله للشعب لا مؤاخذه الكلام ده مش لدول خالص دول عايزين عرقهم.
الريس: والخزانة فيها المبلغ ده؟
مدير مكتبه: للأسف فاضيى يعني زي المثل اللي بيقول "اقرع ونزهي"
الريس مكشر: حتى الراجل اللي كنا بنقصده ساب الحكم وراح وابنه الله وأعلم هيسلفني ولا لأ؟
مدير مكتبه: ولسه فيه ناس تانيه عايزين تعويض بدل إصابة.
الريس: مين تاني ياوش الخير؟
مدير مكتبه: الراجل بتاع الإشارات اللي كان يترجم وراك يده وقفت خالص والدكتور طلب منه الراحة 3 شهور في البيت والشغل رفض.
الريس: يا سلام وأنا مالي دي إصابة عمل.
مدير مكتبه: هو أنت صحيح قعدت 3 ساعات ليه هو احنا مش احنا متفقين على ساعة؟
الريس وهويضحك ومبسوط قوي بصراحة كانت واخدني الجلالة قوي وأول مرة أحس إني ريس بجد قولي الشعب قال عليا إيه؟
مدير مكتبه: زي كل مرة.
الريس: برضه مش فاهمين حاجة وتايهين مش كدة؟
مدير مكتبه: لا.. بس أنت عارف إن ربع الشعب نام الساعة 9م والربع التاني في المواصلات وقدام البنزينات.
والنص التاني معارض يعني النص ماشافش حاجة كالعادة.
والنص التاني مظبطك على القنوات والفيس وتويتر.
الريس يضرب رجله في الأرض: أنا فاشل فاشل وسبب فشلي الفيس بوك وتويتر حلفاء الشيطان أنا عايز فتوى تحرم استخدامهم.
مدير مكتبه: معلهش تتعوض المرة الجاية متزعلشي نفسك.
الريس بزعل: لا مرة جايه ولا مرة رايحة.
مدير مكتبه: على العموم أنت عملت اللي عليك وتعبت قلبك واللي مش عاجبه يشرب من البحر.
الريس بزعل: خلاص توبة دي آخر مرة أخطب فيها إن شاء الله تولع حتى خلاص حرمت أخطب تاني لشعب مصر!