أيمن بهجت قمر يرد على نادر أبو الليف: "مقصرتش معاك"

رد المؤلف أيمن بهجت قمر على ما قاله المطرب نادر أبو الليف، عن تقصيره في حقه في العمل.
وعبر حسابه "فيس بوك"، على كتب أيمن بهجت قمر موضحا أن هذا الموضوع منذ 7 سنوات وأنه لا يحب الحديث عنه خاصة لوجود صلة قرابة بينه وبين نادر أبو الليف، لكن لأن الأخير ظهر أكثر من مرة وتحدث عن الأمر، وجب التوضيح.
وحكى ما حدث قائلا: "في 2009 لما اشتغلنا أنا وتوما والملحن محمد يحيى وقدمنا أول ألبوم لأبوالليف من إنتاجنا احنا ما استخسرناش أي حاجة معاه وعملنا ألبوم كسر الدنيا وللي حضراتكم ماتعرفهوش اننا لما تعاقدنا مع شركة إنتاج في وقت عزها وعز قنواتها اتفقنا أنا ويحيى وتوما على أن المبلغ اللي هتدفعه ميلودي هنقسمه على أربعة ومافكرناش أننا أسماء ونادر صوت جديد وبعد ما نحسب مثلا التكلفة الفعلية الكبيرة لللبوم واعتقد الكواليتي كان واضح يعني احنا كنا جدعان معاه وأوي كمان وكنا كمنتجين بناخد نسبه احنا التلاته 10 في الميه لكل واحد يعني لو ابو الليف طلع فرح كان بيطلع لي 300 جنيه".
وأضاف : "حصلت مشاكل الشركة كانت بتقفل وحصل بينا وبينهم مشاكل وقضايا وكان ابو الليف هيتوقف لجأنا للمستشار مرتضى منصور اللي وقف جنبنا وقتها بلا مقابل بسبب تعاطفه معانا وبسبب تاني ان امير مرتضى كان عايز يخدمني ويستجدع معايا كعادته وبالفعل نجحنا اننا نتعاقد مع شركة نجوم ريكوردز ومضينا معاهم وتاني قسمنا مبلغ التعاقد على اربعه برغم اني كنت بطلع خسران كل البوم ومابكملش أجري كشاعر في الاغاني بس كان حماسي طاغي للتجربه".
وأستكمل قائلاً:" بالرغم من أنه كان بيشتكي أن نوعية الأغاني اللي بكتبهاله مش بتأكله عيش زائد اننا متفقين معاه مافيش شارع الهرم من البداية جه قال أنا عايز أغني شعبي صرف وده ماكانش اتفاقنا اتفاجئنا اول ما سابنا انه راح عمل اغنيه اسمها كينج كونج 2 مع أخويا الشاعر هشام صادق وطبعا انا مازعلتش لإن ده هشام ومعاه مني تصريح يعمل اللي هو عايزه احنا اخوات بس استغربت بصراحه انت ليه يا نادر سبتنا عشان اغانينا مش بتنزلك لايف ورايح تعمل تاني نفس اللون! المهم لما مامشيتش الدنيا ابتدى يلمح بتقصيرنا معاه في اللقاءات وإلتزمنا الصمت .. سمعت كلام من عينة ان انا مانع ظهوره في القنوات واستغربت انه شايفني بالقوه والسطوه دي وكلام كتير بيوصلني بس مش ده المهم".
واختتم كلامه: من سنتين لقيت الفنان أحمد فهمي بيرشحه لتتر مسلسل الواد سيد الشحات رحبت جدا وعادي والأغنية نزلت .. فأنا حقيقي مش فاهم لحد دلوقتي هو بيقول ليه كده وعايز ايه واحنا قصرنا في ايه ربنا يوفقك يا نادر ويكتب لك الخير في حياتك ومن فضلك كفايه لحد كده .. واسف طولت جدا.