"مبارك": "أوباما" طلب منى تسليم البلد ل"البرادعى" لكنى رفضت.."الإخوان" لا تعمل في النور و"عبد الناصر" كان فاهمهم كويس..رفضت أن يكتب "هيكل" خطاباتى.. و"الفقى" بيهاجمنى علشان يسترزق

واصل الرئيس السابق حسنى مبارك مفاجأته، متطرقا للأحداث التي تمر بها مصر الآن، وأكد في تسجيلات صوتية انفردت في نشرها الزميلة "الوطن" أنه رفض مطلب الرئيس الأمريكى أوباما أثناء اندلاع ثورة 25 يناير والذي يطالبه فيه بتسليم البلد لمجموعة من السياسيين، ومنهم محمد البرادعى.
وقال: "اتصل بى الرئيس الأمريكى باراك أوباما وقت الثورة.. مرتين أو تلاتة. وبصراحة ما رضتش أرد عليه.. في الآخر رديت.. فسألنى: إيه الموقف عندك الآن؟!.. وقبل أن أرد.. بادرنى أوباما: أنا رأيى تسلم البلد لمجموعة من السياسيين منهم محمد البرادعى.. فقلت له: الكلام ده أنت اللى بتقوله؟!.. فقال: نعم، فقلت له اسمع يا أوباما أنا أفهم الشعب المصرى أكثر منك وأنت تفهم الشعب الأمريكى أكثر منى، وأنا لا آخذ أوامر فيما يخص الشعب المصرى، أنا آخذ أوامرى من الشعب المصرى وحده، لو الناس عايزانى أمشى، أمشى فورا، وأنا دوري إنى أنبه الشعب لخطورة الوضع اللى هوه فيه.. وبعدها انتهى الاتصال بيننا".
انتقد الرئيس السابق حسنى مبارك إدارة جماعة الإخوان المسلمين في الحكم، مؤكدا أنهم لا يستطيعون العمل في النور.
كما قيم أداءهم في الحكم وقال: "كل اللى حكموا مصر يعرفوا الإخوان كويس يعنى جمال عبد الناصر وأنور السادات وأنا نعرف عنهم كل حاجة.. ده بحكم موقعنا والتقارير والمعلومات، التي كانت تصل إلينا.. علشان كده كان عبد الناصر يتعامل معهم بطريقة تحافظ على البلد، لأنهم كانوا عايزين ينقلبوا عليه أكثر من مرة.
والسادات غلط لما فتح لهم الأبواب، هوه بصراحة كان راجل عظيم وكان عاوز ينفتح على الكل. وأوضح الرئيس السابق أن الإخوان طول عمرهم عايزين السلطة والحكم، لكن المشكلة أنهم غير متعودين على العمل في النور، وبيفضلوا الشغل في السر، مشيرا إلى مصر كدولة كبيرة وعريقة وشعبها متنوع لا يمكن أن تدار في السر.
وتابع: "هما مش فاهمين الكلام ده.. عندهم مشكلة مع العصر الحديث.. لكن إحنا بحكم موقعنا كنا عارفين أسرار لا يعرفها الشعب، علشان كده أنا بلتمس للناس العذر لما اختارتهم.. لأنهم مجربوش الناس دول قبل كده".
وأضاف مبارك: "أنا بصراحة متفاجئ من أدائهم.. كنت فاكرهم أفضل من كده بكتير.. هما مش فاهمين مثلا في الاقتصاد.. بيشتغلوا فيه بطريقة "التاجر".. وده غلط.
وكمان عندهم شك على طول في كل الناس.. طيب إزاى هنشتغل ونرفع البلد ونحل الأزمات وإحنا عندنا شك في الشعب والمعارضة!!
وكشف الرئيس السابق في حديثه عن علاقته بالكاتب الصحفى محمد حسنين هيكل وقال: "هيكل له حكاية معايا.. فأول ما توليت الحكم.. جاءنى أسامة الباز وقال لى: إيه رأيك في هيكل يكتب خطبك السياسية؟.. ففكرت قليلا وقلت له: هيكل كان بيشتغل مع عبد الناصر.. وبعد كده استبعده السادات.. والمشكلة إنه هيحط لى في الخطبة رأيه.. ولما أغير حاجة أو متعجبنيش حاجة.. هيزعل.. اسمع يا أسامة الراجل دا كان بيكتب لعبد الناصر معقولة هيكتب لى الخطب.. لأ ميصحش.. وهربت منه كده.
وأضاف مبارك: هيكل بيحط أفكاره هوه.. وعايزنى أقرأ وبس.. وأنا مش لعبة في إيد حد.. أنا أفكر وأقول اللى يكتب لى الخطبة أكتب كذا وكذا وكذا.. أنا أقول لك أنا عايز أتكلم في كيت وكيت حتى مرة موسى صبرى كان بيكتب لى الخطبة ودا كان أول ما تعينت وقال لى موسى: لازم ندى أمل الناس: وقلت له: لا ماينفعش تضحك على الناس: الناس لازم تعرف الحقيقة: أنا مش هضحك على الناس.. على فكرة أنا أول ما تعينت كانت البلد تعبانة قوى.. بس مش بالفوضى الحالية.
وتطرق عما يقوله دكتور مصطفى الفقى في حلقات برنامجه عن فترة حكمه؟..أجاب: " مصطفى الفقى ساب الرئاسة من زمان.. بس الواحد بيعرف الرجال في الصعاب، مصطفى الفقى بيكتب في الجرايد ويطلع في التليفزيونات عشان ياخد فلوس.
وعن رأى الرئيس السابق في إبراهيم عيسى، قال: "أنا كمان بشوف إبراهيم عيسى.. الراجل ده محترم وبيقول الحق، ورغم إنه كان بيعارضنى إلا أنه بيعجبنى لأنه ما بيخافش، وحين سئل عن مرتضى منصور، علق ضاحكا: ده مدفع.. مدفع".
واستنكر "مبارك" ما فعله الرئيس مرسى وجماعته ونسبهم لمشروع قناة السويس لهم وقال: "الإخوان بينسبوا دلوقتى كل حاجة لنفسهم دول حتى.. دا حتى مشروع قناة السويس إحنا اللى عاملينه.. إحنا عملنا مصانع هناك وأعطينا الصين مساحات وشيدنا مبانى.. ومن كام يوم شهدت مرسى والحكومة والإخوان عاملين قصة عن المشروع دا وكأنه إنجازاتهم.