إسماعيل ياسين في شم النسيم: آه ياني يا محبوس يا سمعمع

هو فين يا أخويا شم النسيم اللى بيقولوا عليه ده.. دا أنا مش شامم أيتها نسيم أنا لا أشم سوى رائحة المدام في الحبسة السودة اللى أنا فيها دى، آه يا دهوتى السودة يانى يا مااااما، راحت فين الجناين والمنتزهات، أين أنت يا حديقة الحيوانات.. إننى أشعر يشلاضيم بُقى تكاد أن تتركنى وتذهب لكوبرى عباس.
الله يخرب بيت الكورونا واللى جابوا الكورونا اللى حبستنا في البيوت زى الفراخ، دا أنا شعر راسى أصبح مثل شجرة القرنبيط.. حتى الحلاقين محبوسين.. حاسس إنى بقيت عبارة عن كرش وطالع له راس بنى آدم.. فأنا لا أفعل شيئا إلا الأكل.. حد ينقذنى من الحبسة اللى أنا فيها دي.
قال إيه ياخويا بمجرد ما المغرب يأذن تحس كده إن العٍشة اتفتحت وحد بيقولك بيتك بيتك علشان تستكن في عشتك، فين أيام شم النسيم الجميلة؟ فين الخروجات؟ فين التجمعات؟ فين المراكب والمنتزهات؟ فين الفسيخ؟ فين الرنجة، فين الخص فين الكُرات.. آه يانى يا محبوس يا سمعمع .. ياما نفسى أجيب الفيروس اللى اسمه الكورونا دا وأمضغه بأسنانى وأقفل عليه شلاضيمى وأحبسه نفس الحبسة اللى انا محبوسها دى.. آه يانى يا محبوس يا سمعمع
الولية راسها وألف سيف إنى أجيب فسيخ ورنجة ونطلع نشم النسيم في البلكونة.. بلكونة إيه يا وليه يا مفترية في الجو الحر ده.. انت عايزة الشمس تاكل نافوخى بدلا من أن تأكله الكورونا؟!.. روحى يا شيخة ربنا يكملك بجنانك ويذهب عنك كوفيد 19
إننى أشعر بالانعياى.. دا أول شم نسيم نتمنع فيه من الخروج منذ أيام الفراعنة، طب أنا ألون البيض لمين دلوقتىي يعنى.. يا فرحة كانت مالية عينيا.. استكترتها الكورونا عليا.. حد والنبى يلحقنى بفحل بصل وليمونتين علشان احس إنى في شم النسيم.. طب حد يحدفنى من البلكونة علشان شلاضيمى تشم الهواء الطلق وأشعر بأننى في شم النسيم.. عموما كل سنة وأنتم طيبين ومن الكورونا محفوظين.. والعام القام لن تكونوا محظورين.. سلامو عليكووووووووووووووو