المصريون يحلمون بالمدينة الفاضلة بهاشتاج "نفسى فى مصر".. أحمد: نسمع بعض فيها.. سارة: لما حد يغلط يعترف بغلطه ويتأسف.. يوسف: نفسى النور ميقطعش.. حسام: يكون فيه رئيس بجد

"نفسي في مصر"، هاشتاج عبر فيه المصريون عن رغبتهم في أن تصبح مصر المدينة الفاضلة، وألا تكون بها أخطاء وأن يتشارك الجميع فيها دون أن يتدخل أحد في حياة الآخرين، وألا يكون هناك فقر يتسبب في ذل أحد وخاصة كبار السن، وأن يكون هناك رقي في الفن والثقافة.
قال أحمد عزيز: "نفسي في مصر الناس نسمع بعض".
سارة الجريتلي: "نفسي في مصر لما حد يغلط يعترف بغلطه ويتأسف.. مفهاش حاجة كلنا بشر وبنغلط.. مش يبجح ويشتم كمان!"
دكتور بهيج: "نفسي في مصر محدش يتدخل في حياة غيره."
يوسف خاطر: "نفسي في مصر النور ميقطعش".
مها: "نفسي في مصر شوارعها نضيفة ومفيهاش أطفال شوارع ولا متسولين.. نفسي فمصر مفيهاش طفل عنده سرطان ولا راجل عيان ولا ست مش لاقية".
محمد: "نفسي في مصر من غير داخلية".
خالد حاتم: "نفسي في مصر‎ أن كل واحد ميفتكرش أنه مش هو المشكلة.. والباقي هما المشكلة.. مسمعش كلمة "هي جت عليا".
منه الناقة: "نفسي في مصر اللي بيشتغلوا في المصالح الحكومية يكونوا راضيين بجد بشغلهم، عشان ما يطلعش علينا التكشيرة بتاعتهم دي".
عمر حرارة: "نفسي في مصر أشوف حقوق للإنسان !! مشوفش واحدة عندها 60 ولا 70 سنة بتبوس ايد واحد مكملش 20 سنة عشان يديها جنيه".
حسام كارلوس: "نفسي في مصر المصانع ما تعرفش تفتح من قلة الأيدي العاملة.. ونحسن من الفن الراقي ونقلل من المهرجانات والشعبي".
أحمد شريف: "نفسي في مصر محدش يشوف نفسوا على التانى لمجرد أن عندوا سلطة أعلى بس.. بدل ما الشباب عمالة تعمل في فرق موسيقية وتقول احنا بنعمل إللى بنحبوا لأ تشتغل كويس في أي مجال يساعد مصر إنها تتقدم".
حسام: "نفسي في مصر يكون في رئيس بجد.. يكون في مساواة.. يكون في عدل".
خالد دراهم: "نفسي في مصر أكون عايش".
محمد الجندي: "نفسي في مصر مسمعش سب دين وانا ماشى في الشارع".
حبيبة إبراهيم: "نفسي في مصر يكون عندنا التزام.. البس اللى عايزاه ومكنش خايفة وانا نازلة".
ميرنا داوود: "نفسي في مصر نرجع نضحك تاني.. والشهداء فيها مش جرافيتي بس".
ريم موسي: "نفسي في مصر يبقي عندنا تعليم بجد عشان اللي موجود دلوقتي ده تهريج مش تعليم إطلاقًا".
عبده حربي: "نفسي في مصر الثورة تنجح والقتلة يتحاسبوا وولاد... يخلصوا كفاية كده".
هبة مصطفي: "نفسي في مصر عبادة العادات والتقاليد تقل شوية والناس تفكر بعقلها مش بكلام الناس"!
أعصر: "نفسي في مصر اللي اتخيلناها بعد الثورة".
على الباسل: "نفسي في مصر اللى بتيجى على قناة 25".
سما خالد: "نفسي في مصر يكون في Diseny land" ".
خالد أحمد: "نفسي في مصر الجو مايبقاش حر طول السنة !".
سما خالد: "نفسي في مصر كل واحد يراعي ضميره في إلى بيعمله وبلاش فهلوه".
علياء عصام حسن: "نفسي في مصر الناس تركب عجل واسكوتر، وموتسيكلات لأ.. والحنطور يرجع".