حملة "تمرد" تجمع توقيعات إلكترونية لسحب الثقة من مرسى

بدأت حملة "تمرد" فى تجميع توقيعات لسحب الثقة من الرئيس محمد مرسى وإجباره على إجراء انتخابات رئاسية مبكرة، الحملة لاقت استحسان الشباب ونشروا الفكرة عبر صفحاتهم، ويقول أدمن صفحة "أنا إخوان أنا مقطف بودان" أحد الداعمين للحملة ..
واحد يقولى يا أدمن هو احنا ازاى ندعم حملة "تمرد" ونجمع توقيعات ليها.
بص يا سيدى وبصى يا ستى..
إنت هتنزل الصورة دى على جهازك وتاخدها على فلاشة وتروح تطبعها أبيض واسود فى مكتب كمبيوتر.. لو مش عندك فلاشة هتعمل شير للبوست على الأكونت وتروح مكتب الكمبيوتر وتدخل منه على الأكونت بتاعك وتحمل الصورة على الجهاز وتخلى الراجل يطبعها.
وبعد كده تاخد الصورة على مكتب تصوير مستندات عادى تصورها بتاع 20 أو 30 نسخة ب 3 جنيه.
تروح لأهلك وجرانك واصحابك وتخليهم يوقعوا عليها، تاخد استمارات معاك الكلية وتخلى الطلبة زمايلك يوقعوا عليها (ولو فى بنت معجب بيها أهى طريقة تجر معاها كلام).
المهم تجمع مثلا 20 أو 30 استمارة.
عزيزة إبراهيم: طيب وفى النهاية إيه اللى هيحصل لما نجمع الأوراق دى؟؟ .. يا خوفى ليكون صاحب فكرة الحملة واحد بيورد ماكينات زيروكس أو إتش بى.
يوسف حجاج: المفروض الناس المتفاعلة مع الحملة تنزل الشارع بشكل أكبر.
محمد مصطفى: أنا عايش فى الكويت وعايز أشارك وأوقعها وأبعتهالكم، ياريت تقولولى ازاى.