أمر ظبط واستحمار

قاعدين يقولولنا تطهير القضاء وتطهير ماء المجاري وتحلية مياه الشرب .. ولا المية حطولنا فيها سكر ولا القضاء رشوا عليه بيروسول ولا ماء المجاري ريحته بقت برفان ..
وكل شوية نسمع فلان مسكوه وفلان بيعذبوه وفلان راح ورا الشمس وكنا فاكرين انهم قفلوا فرع ورا الشمس ده خلاص بس اتاريه لسه مفتوح علي البحري وكمان اتعمل فيه توسعات كبيرة واصبح ورا الشمس وورا القمر وورا النجوم
ودلوقتي بقي فيه موضة جديدة لورا الشمس بعد ما كانت شاليهات اتحولت لمنتجعات وتايم شير ..يعني شوية يدخلوا وقبل ما ينتقلوا الي الرفيق الاعلي بيكون جه شوية غيرهم يقضوا نفس المدة للاستجمام
وانا بقي اعدة ولا علي بالي لقيت ان الموضة دي هي موضة الظبط والاستحمار ..حيث انه يتم استصدار امر ظبط زوايا للبني ادمين .. فيفكوا نافوخك ويستبدلوه بنافوخ تاني او يفكوا عنيك ويسيبوك من غيرها او يفكولك صواميل رجليك وتمشي من غير صواميل ده عن الظبط .. اما الاستحمار فهو المرحلة الثانية من الظبط حيث يتم استحمار كل المقبوض عليهم واتهامهم بتهم غريبة مش موجودة في اي كتاب ولا حتي كتاب ابلة نظيرة
وفي زمن العجايب نوصل لزمن الظبط والاستحمار والناس بتفكر تبعت الحمار القمر يعمل رسالة ماجستير عن كيفية تعمير المريخ ..