نشطاء يسخرون من «وكالة الفضاء المصرية».. عبد الرحمن: كلام عن إنشاء أول موقف ميكروباصات في المدى.. فؤاد: يا أهل المجرة كوكب زحل يخص مصر.. أحمد: هيكون عندنا أكبر وكالة فضاء في العالم

دشن نشطاء مواقع التواصل الاجتماعي "فيس بوك وتويتر" هاشتاجا ساخرا بعنوان "وكالة الفضاء المصرية"، الذي احتل مركزًا متقدمًا في "تراند مصر" على تويتر، حيث سخر النشطاء من موافقة مجلس الوزراء على مشروع قانون بإنشاء وكالة الفضاء المصرية.
موقف ميكروباصات
قال عبد الرحمن الدميردي: "وكالة الفضاء المصرية.. وفي كلام عن إنشاء أول موقف ميكروباصات في المدى"، وأضاف علاء نور:"ده فيه ناس في مصر أقصى أملهم يركبوا توكتوك ويقعدوا جنب الشباك"، وعلق التركي حسن: "على فكرة احنا هنعمل وكالة مش عشان نطلع الفضاء احنا هنستني الفضاء هوه اللي ينزل لينا احنا مبنروحشي لحد.. وكالة الفضاء المصرية".
ورد فؤاد محمود قائلا: "اسمعوا يا أهل المجرة كوكب زحل يخص مصر أم المجرات أي حد يدحرج نواحيه هقطع وشه.. آمين تحيا مصر.. وكالة الفضاء المصرية"، وتابع بلبل بلستكاوي: "ودي بتوزع عيش.. وكالة الفضاء المصرية".
وكالة البلح
كتب أبو ماندو: "وكالة الفضاء المصرية.. حاجة كده زى وكالة البلح عدم اللامؤاخذة"، وأضاف محمد ليلة:"السيدة "شات أب يور ماوس أوباما".. ستكون بالطبع أول رائدة فضاء في.. وكالة الفضاء المصرية"، وسخر أحمد ديفل:"عاوز أخد أرض جنب الأوتوستراد القمري أبني عليها".
وعلق أحمد حسن:"وكالة الفضاء المصرية.. احنا زي ما عندنا أكبر وكالة بلح في الشرق الأوسط وشبرا بعون الله هيكون عندنا أكبر وكالة فضاء في العالم والجمالية"، ورد هاني فوزي: "وكالة الفضاء المصرية احنا أصلا عايشين فيها، كمية الكائنات الفضائية اللى بنقابلها كل يوم دى بتأكد لك إن احنا مش على كوكب الأرض".
وتابع عادل حجازي: "وكالة الفضاء المصرية...هتساهم في حل مشكلة الصرف الصحي في مصر وتهالك الشبكة!! ما تسألش ازاى!!".
مكوك فضائي
وقال أسامة العرابي: "مكوك فضاء موديل 2001 وارد ناسا استخدام طبيب عداد 2000 سنة ضوئية.. وكالة الفضاء المصرية"، وأضاف وليد التوب: "حليها وعليها وفى الفضاء خليها.. وكالة الفضاء المصرية"، وعلق محمد حربي: "عايز اشتغل فيها حارس فضاء ولا الشغل فيها بالواسطة"، وردت مني صلاح الدين: "تعددت الوكالات والفضاء واحدا.. وكالة الفضاء المصرية"، كما سخر خالد عبد الواحد قائلًا: "سألتك حبيبي لويين ريحييين خلينا خلينا دا مفييش أكسوجييين.. وكالة الفضاء المصرية".
وقال أيجي زملكاوي:"المجرة الجاية ياسطا لو سمحت.. بينزل ويرزع الباب.. - براحة ع الباب يا أستاذ المكوك لسه عليه أقساط.. وكالة الفضاء المصرية"، وتابع حسين إمام: "خلينا نسميها "يا زانقني والدنيا براح" للرحلات المكوكية.. وكالة الفضاء المصرية".