بالفيديو.. فيفي عبده ل«الإبراشي»: رقصت أمام بيجن وعلم إسرائيل تحت رجلي.. قبلاتي لا تخدش الحياء.. «صاحب شائعة جائزة الأم المثالية إنسان مش محترم».. و«كيم كارداشيان» عايزة تبقى حلوة زي المصريين

حلت الفنانة فيفي عبده، ضيفة على الإعلامي وائل الإبراشي، ببرنامج «العاشرة مساءً»، المذاع عبر فضائية «دريم 2»، في حوار ممتد للحديث حول مشوارها الفني، كشفت خلاله العديد من الأسرار خلال مشوارها في عالم الرقص الشرقي.
الفالنتين
هنأت الفنانة فيفي عبده المصريين بمناسبة عيد الحب، قائلة: "happy valentines day على كل حبابيبي اللي بيشوفوني في العالم كله.. وأنا رقاصة شرقية، والناس في العالم كله بيشوفوني".
وأضافت: "الحب الآن أصبح غير أيام زمان، والوضع اختلف بشكل كبير.. وممكن تلاقي إن البنت هي اللي بتعاكس الولد".
عظماء القوم
وقالت الفنانة: «أنا كنت برقص لعظماء القوم لكن الناس مكنتش عارفة شكلي.. وكان ناقص أرقص في البيت الأبيض.. وقررت أمثل عشان الناس تعرفني».
وأضافت: «كنت بعيط لما الناس متعرفنيش وأنا ماشية في الشارع.. وبحب الناس تسلم عليا لما يشوفوني في الشارع ويقولولي إزيك يا فيفي».
أيام الدراسة
وقالت الفنانة: «أنا خرجت من المدرسة وأنا في رابعة ابتدائي.. ومكنتش أعرف حاجة عن النت وفيس بوك ولا أي تكنولوجيا.. والأسرة بقت مفككة وكل واحد قاعد مع موبايله».
وأضافت: «قولت لبنتي هنادي انتو بتعملو إيه على الموبايلات دي وفيس بوك وإنستجرام.. أنا عايزة أكتب للجمهور بتاعي الكبير على مواقع النت دي.. وخلتها تعملي صفحات وخليتها تكتبلي 5 أمواه».
«قبلات»
وقالت الفنانة إنها لا ترى أي خدش للحياء في برنامج «5 أمواه»، قائلة: « بعد ما قلت 5 أمواه كل الناس قالت زيي وعملت أمواه لكل معجبيني».
وأرسلت «فيفي» قبلة لجمهورها خلال لقائها بالبرنامج، قائلة: «ما أنا ممكن أبعت بوسة لأي حد وأنت ممكن تبعت بوسة لأي حد بتحبه وبعد أي رقصة ببعت بوسة للناس».
«كيم كارداشيان»
وقالت الفنانة: "أنا اللي بكتب كل الكلام على صفحاتي في الميديا، واتعلِّمت أكتب كويس بالعربي خلال سنة واحدة، ومكنتش عارفة أكتب صباح الخير، وبنتي علِّمتني، ومش مكسوفة إني مكنتش بعرف أكتب، ومبسوطة لأني أتعلمت".
وأضافت: "أنا بحب الرقص جدًا، وسافرت الصين واليابان ورقصت هناك.. واكتشفت إنهم بيحبوا الرقص زي حبهم للغة الإنجليزية".
وتابعت: "العرب أحلى من الغربيين، وكيم كارداشيان عايزة تبقى حلوه زي المصريين والعرب، وبتحاول تجذب جمهورها بجمالها، لكن المصريين والعرب أحلى".
علم إسرائيل
وقالت الفنانة: "رقصت قبل كدا أمام مناحم بيجن رئيس وزراء إسرائيل الأسبق، ومكنتش أعرف إنه موجود في المكان، وخلال الرقصة لقيت واحد بيحدف لي علم إسرائيل علشان أرقص بيه، فحطِّيت علم إسرائيل تحت رِجلي، ووقفت أقول «يا حبيبتي يا مصر»، وسِبت المسرح وخرجت".
وأضافت "فيفي": "قبل كدا برضه رقصت قدام موشى ديان السياسي الإسرائيلي، وكنت بخاف منه؛ لأني متربية على أن ده بُعبع وبيخوِّف".
أنور السادات
وقالت الفنانة،: «رقصت أمام الرئيس الراحل السادات في أحد الأفراح وكانت زوجته جيهان موجودة ومزعلتش مني لما قولت إني من نفس بلد الرئيس السادات وأنا أبويا فعلًا من المنوفية».
وأضافت: «مصر دايمًا بتجيب رئيس كويس وطيب ومن الشعب.. والرئيس السادات لم يغضب مني ورقصت أمامه بعدها».
وتابعت: «مصر دي نعمة من ربنا على المصريين وبتلم كل الناس من كل العالم وبحب عيشة المصريين البسيطة وبلدنا فخر لأي شخص وأنا هموت وأعيش في مصر».
جائزة الأم المثالية
وقالت "فيفي"،: «اللي قال إني أخدت جائزة الأم المثالية إنسان مش محترم.. ومعرفش جابو منين الموضوع ده.. وبعدين إيه المشكلة لو أنا كنت الأم المثالية أنا عرفت أربي أولادي.. وأنا أتكرمت من أماكن كتير ومش مهم عندي أحصل على جائزة الأم المثالية».
وأضافت: «أنا مش أم مثالية.. وفجأة لاقيت الناس عماله تهزر على فيس بوك ومواقع النت وكل الناس عماله تهرج وتتسلى بالخبر وتتسلى في أعراض الناس».