بالفيديو.. ريهام سعيد تفتح النار على «يسري فودة» بعد انتقاده برنامجها: «أنت بالوعة إخس عليك».. « أنا مليش أسياد زيك وبص لأصلك».. ميشرفنيش تتفرج عليا.. وأنت اتشهرت اليومين دول على حسابى

هاجمت الإعلامية ريهام سعيد، الإعلامي يسرى فودة، قائلة: «عملت إيه لمصر، وللسوريين، كنت بتدينا درس في اللغة العربية كل يوم على الشاشة».
ووجهت خلال برنامج «صبايا الخير»، المذاع على فضائية «النهار»، رسالة ل «فودة» قائلة: كلامك ده من أخلاق بتوع قناة الجزيرة، وفي فرق بين التليفزيون والكابينية أبقى خد بالك كويس يا محترم».
وتابعت: «أنت اتشهرت اليومين دول على حسابى.. نسيت لما عملت حادثة واتكسرت ضلوعك، والجيش خصصلك طائرة تنقلك للمستشفى، وأنقذك من الموت.. أنا من عبيد البيادة ياسيدى.. وكل واحد حر.. وكل نقطة دم بتهدر في سيناء أنا عارفة قيمتها.. أتحداك تروح تقف لحظة في سيناء، أو تدخل العريش.. روح دافع عن بلدك».
عرضت ريهام، مقطع فيديو للإعلامي يسرى فودة، وهو يعلن استقالته من حب الرئيس المعزول محمد مرسي، قائلة: «يا حبيبى قلبى..استقلت من حب مرسي..حبيبى..إخس».
ووصفت «ريهام» يسري فودة ب «البالوعة»، مضيفة: «هو ده الإعلام الهادف اللى أنت بتتكلم عنه».
وتابعت: «هو أنت كنت فاكر أن الأستاذ محمد مرسي ده هيقوم بالأمة..إخس.. أنا لومكانك مفتحش بوئي خالص.. وأنا ميشرفنيش ابدًا تجيب سيرتى.. وميشرفنيش تتفرج عليا.. وهناك فرق بين الكبانيية والتليفزيون وبلاش تشوف الحاجة اللى بضايقك ديه».
وأضافت: «أنا مليش أسياد زيك.. ولو ليا أسياد فشرف ليا لأنهم مصريين، مش من جنسية تانية زى غيرى».
وأكدت أن الشعب السورى، لن يأخذ بكلام فودة».
وتابعت: «بحب قناة السويس الجديدة.. ومع ذلك متعزمتش في حفل الافتتاح.. يسرى فودة تحيا مصر.. تحيا مصر.. تحيا مصر.. غصب عنك.. واسيادى هما اللى شالوك من على الأرض وودوك المستشفى.. وبص للغتك وأصلك..هذا هو يسرى فودة».
وكان يسري فودة هاجم ريهام سعيد على حسابه، لتناولها قضية اللاجئين السوريين في برنامجها بشكل غير إنسانى، حسب قوله واصفا برنامجها بأنه إحدى بالوعات الصرف الإعلامي في مصر».