هلوسة

انفعل المعلم فتوح المفتح على المعلم زينهم وقال يا أخي دا كأنه برنامج «حيلهم بينهم» فقال زينهم أكيد تقصد تغيير الحكومة، فعاجله المفتح وقال أيوة يا بومة فتدخل فتلة في الحوار وقال الموضوع دا شكله فيه أسرار طب فين بقى التغيير آه ما أنا لازم أفهم أصل إحنا مش حمير..
فتوح: أداء كتير من الوزارات مكنش ولا بد، وقلنا الوزير دا هيتشال في الخبط والهد، والدنيا تمشي بالتطوير، ولكن فضل الوزير في مكانه سلطان زمانه ولاتشال في التغيير، التغيير كان لازم يكون شامل ويتشال الوزير الخامل لكن نعمل إيه أدي الله وأدي حكمته..
زينهم: الرك على الجاي وكل وزير بقى وهمته يا يثبت أنه تمام يا يتشال قوام..
فتلة: أهو كله لحد ما يجي المجلس والوزير اللي هيتربس محدش هيسمي عليه..
فتوح: آه وكل وزير يراعي بقى ربنا ويحط وزير الزراعة قدامه عبرة
زينهم: يوووو دا وزير سيرته غبرة، ريحة الفساد في وزراته كانت انتشرت
فتلة: لما نشوف إنشاء الله تبقى أيام واندثرت..
فتوح: الأيام اللي فاتت بقت «إند أوف تكست» ومات الكلام واللي جاي أحلى من غير غش ولا أوهام
زينهم: غيروا السيرة دي بقى وخلونا في ماتش الأهلي والزمالك
فتلة: يا منجي من المهالك، لا ياعم وخليك مع الله تبقى سالك
فتوح: طب واللي بيحصل في فلسطين..
زينهم: ليلتك هباب وطين، طب ليه بقى السيرة اللي توجع القلب وتطير النفسين، واقتحام المسجد الأقصى على عينك يا تاجر والعرب لسه بيحلموا بحطين..
فتلة: والله ضحكتني هما فين العرب يا أبو قلب أبيض وبخطين.. والوطن العربي بقى «منقد» نار..
فتوح: يا ستار..
فتلة: وسحب الدخان طالعة من العراق واليمن وسوريا وليبيا
زينهم: دي الحكاية بقت لوبيا.. معاك حق ما كله عند العرب طبيخ والكل بيشرب مية البطيخ
فتلة: وآخرتها..
فتوح: دي حكاية ملهاش آخر.. عدوك واقف على الباب وأنت دماغك ملحوسة هباب، ودايما ملهي في مشاكل، وإن غمضت شوية هتتاكل..
زينهم: دا قدرنا نكون كدا.. ومكتوب علينا
فتلة: ولا بأيدنا زرعنا الشوك ولا روينا
فتوح: لكن بإيدنا زرعنا البانجو يا فخفينا
وهنا صرخ فتلة وقال: بس بقى يا عم أنت وهو كفاية هزار، وطفوا بقى النار، دي الدماغ بقت ملحوسة، وكلامنا كله هلوسة.