هاشتاج «رجعوا لنا الأهلي» يفجر «تويتر».. أحمد: «مشربش عندك برتقان».. إبراهيم: «اعملوا إعلان في الوسيط».. إيهاب: «ده عليه أقساط».. توتا: «هو اللى بيروح بيرجع تاني»..الهوارى: «كان فيه وخلص»

دشن مستخدمو موقع التواصل الاجتماعي «تويتر»، مساء اليوم السبت، هاشتاجًا جديدًا ساخرًا بعنوان «رجعوا لنا الأهلي»، تفاعل معه الكثير من محبي الساحرة المستديرة، ساخرين خلاله من هزيمة النادي الأهلي أمام نظيره أورلاندو الجنوب أفريقي، في المباراة التي جمعت الفريقين، في ذهاب نصف نهائي بطولة الكونفيدرالية على ملعب مبومبيلا في جنوب أفريقيا، ورصدت «فيتو» أطرف التعليقات.
أحمد يوسف:«مشربش عندك برتقان؟؟ ولا كل من عندك بطيخ يا عم الحاج».
عمرو الهوارى: «الأهلي كان فيه وخلص.. احنا في زمن الزمالك».
إبراهيم سعيد: «اعملوا إعلان في الوسيط، افضل حل لعودة الأهلي من جديد رحيل فتحي مبروك وعودة جاريدو فورا».
محمد عادل: «لا ياجماعة بلاش هزار رجعولهم الأهلي إحنا بننام بدري».
توتا الإسكندرانية: «هو اللى بيروح بيرجع تاني».
عمرو أحمد: «انزل دور معايا في الملاحة على الأهلي».
رضا محمد: «زمان فتحي مبروك دلوقتي حاطت الهيدفون في ودنه وبيسمع مافيش صاحب بيتصاحب».
ريمو: «الأهلي ولد أبو جليل ولا الأهلي ولد الطحاوي».
حمدى أحمد: «دور عليه كدا في شنطة فتحي مبروك».
كريم حسن: «نادي تايه ياولاد الحلال».
حسام محمد: «تنويه عن المفقودين رجعوا لنا الأهلي».
إيهاب سيد: «اللي خده يرجعه يا جماعة ده عليه أقساط».
الدالى: «ياجماعه اللى خاطف الأهلي يرجعه عشان جمهوره زعلان».
الشاويش عطية: «رجعوا جاريدو لترجع روح الفانلة الحمرا».
محمد حسن: «سوبر أفريقي دوري أبطال والدوري والكأس فاضل إيه مش هنبكي عليه».
يذكر أن مباراة الأهلي وأورلاندو بايرتس الجنوب أفريقى في ذهاب نصف نهائى الكونفيدرالية، انتهت بخسارة الأهلي بهدف دون رد في المباراة التي أقيمت بين الفريقين، مساء اليوم السبت، على ملعب مبومبيلا في جنوب أفريقيا، ومن المقرر أن يقام لقاء العودة على ملعب السويس الجديد 4 أكتوبر المقبل.