ميه ونور!

تكرار انقطاع التيار الكهربي أثار حفيظة المصريين, وزاد الطين بلة انقطاع المياه في ظل زيادة درجات الحرارة, وحلول شهر رمضان, ومع احتفال ألمانيا بمرور 30 عاما بدون انقطاع التيار الكهربائي تمني شباب «تويتر» أن تحتفل مصر بمرور 3 أيام بدون انقطاع التيار , تعددت ردود فعل الشباب الساخرة علي تلك المشكلة , فماذا قالوا؟..
مبروك محمد : احتفلت ألمانيا بمرور 30 عاما بدون انقطاع للكهرباء .. نفسي نحتفل بمرور 3 أيام.
كامل مراد : وزير الكهرباء أعلن السبب الحقيقي وراء انقطاع النور حيث صرح : احنا بنقطع الكهربة كل شوية علشان عارفين أن مصر منورة بأهلها.
أحمد عزو : فقط في مصر فلوس الزبالة اللي ما بتتلمش بتضاف علي فاتورة الكهرباء اللي ما بتجيش.
هيام نور الدين : النور بقاله يومين مش بيقطع داهية ليكون وزير الكهرباء بعافية ولا حاجة.
شريف محمود : شركتى الكهرباء والمياه بيبدلوا مع بعض ده يجي والثاني يقطع الله يرحم أيام ما كنت بستحمى وأولع النور في الحمام في نفس الوقت .
أمنية عزام : يا جماعة الناس اللي ساكنين جنب النيل يبصوا كده عليه يشوفوا لسه فيه ميه لبكرة ولا خلصت.
جمال البيسي: طفي النور يا بهية .. و لا أقولك استني شوية وهو هيقطع لوحده .
محمد عزت : تويتر : أنا اعرف كل حاجة .. جوجل أنا بقى عندي كل حاجة .. فيس بوك : أنا عارف كل الناس .. النت: كلكوا من غيري كنتوا هتبقوا ولا حاجة .. الكهرباء : خليكوا كده اتكلموا كده يا ولاد التيت لحد ما اضلمها عليكوا.