«شلاليت»

ألف مبروك الرياسة
اللى محتاجة الكياسة
نفسى مرة أشوف رئيسنا
ماشى من غير الحراسة
لما يبقى العدل قايم
وأنت صاحى ولست نايم
حتلاقينى معاك مصحصح
والوداد ما بينا دايم
بس لو ضل الطريق
مش راح أبقى معاك صديق
وإنت عارف قبل منى
لما صدرى في يوم يضيق
نفسى دايماً تبقى صاحى
والتقيك حاسس جراحى
الكلام مش كل حاجة
العمل هو اقتراحى
ألف مبروك حتلاقينا
وانت إيدك بين إيدينا
وإن بدأت الشغل جامد
يبقى والله ابتدينا
وإن لقيت مركبنا تاهت
والأمانى الحلوة راحت
حتلاقينا رجعنا تانى
للميدان والثورة فاحت