هاشتاج «الزبالة يا مسيرى» يجتاح «تويتر».. سماح: «شيل الزبالة واعمل رقم قياسي بالنظافة».. رحمة: «ادخل بالعجمى موسوعة جينيس».. هند: «عروس البحر بقت أرملة الترعة».. منى: «المحافظ بيحاول يعمل حاجة كويسة»

دشن مستخدمو موقع التواصل الاجتماعى «تويتر»، اليوم الجمعة، هاشتاجًا جديدًا حمل عنوان «الزبالة يا مسيرى»، تفاعل معه الكثير من أهالي محافظة الإسكندرية، مطالبين الدكتور محافظ الإسكندرية، بتنظيف المحافظة من القمامة التي أصبحت تملأ كل شبر على حد قول النشطاء، ومن جانبها رصدت «فيتو» أبرز التعليقات.
مى: «شيل الزبالة يا مسيري بدل ما انت فرحان بالتاتو اللى على دراعك».
أحمد: «أول إمبارح جالنا فاتورة ب 150 جنيه نضافة بيقولي بقالكوا 5 سنين مدفعتوش مع العلم إن مفيش حد بييجي ياخد الزبالة أصلا».
سماح: «شيل الزبالة يا مسيري واعمل رقم قياسي جديد بالنظافة وبس».
أشرف: «والعجيب تجد في هذا الشهر أكثر عمال النظافة منتشرين في كل شوارع المحروسة.. ولكن الزبالة كما هي».
حلمى: «بعد كدة موائد الإفطار هاتتعمل بدون جمهور».
مصطفى محمد: «قلت أروح المعمورة الشاطئ دخلت بتذكرة 6 جنيه لقيت هدوء وشوارع نضيفة وفيلات تحفة وأبراج راقية قلت استحالة دي تبع إسكندرية».
رحمة سعيد: «ادخل بشارع العجمى موسوعة جينيس لأطول شارع به زبالة من الهانوفيل إلى موقف الكليو21».
أبو ربيع: «الواحد بقى بينزل من البيت يشوف الزبالة يعرف علطول إنه لسه عايش في إسكندرية».
إبراهيم محمد: «أطول مائدة في العالم.. والوجة التانى أكبر محافظة فيها زبالة ودى برضوا تدخل موسوعة جينيس».
محمد يحيى: «عموما إحنا كده دخلنا موسوعة جينيس عن جدارة في المجال اللي نستحقه.. العشوائية وسوء التنظيم».
هند: «صعبانا عليا إسكندرية عروس البحر.. بقت أرملة الترعة».
إيمى: «في كل شارع في بلادي ريحة الزبالة بتنادي».
منى: «معنديش شك أن المحافظ ده بيحاول يعمل حاجة كويسة بس هو عنده مشكلة في الأولويات والتنفيذ».
نبيل: «شارع جمال عبد الناصر فيه زبالة شمال ويمين وعلى الجزيرة».
وكان انطلق، اليوم الجمعة، ماراثون الاحتفال بتنظيم أطول مائدة إفطار في العالم بطول 6 كيلو مترات في محافظة الإسكندرية، تبدأ المائدة من كوبري ستانلي، وحتى سان ستيفانو، ويهدف منظمو الاحتفالية إلى كسر آخر رقم قياسي لأطول مائدة في العالم تم تسجيله في إيطاليا بطول 2 كيلو متر.