«الغرام».. قصيدة جديدة للشاعر «جمال بخيت»

الغرام مش كلام
بحر كان هايج ونام
الغرام مش سلام
نظرتين وسط الزحام
الغرام مش هيام
جوة العيون
مش حكاية نسمة سارية
ورفرفة بجناح حنون
مش عصافير الكناريا
وزقزقة فوق الغصون
الغرام
زلزال جنون
عربدة وحكمة ومجون
انتحار في حضن نشوة
إما أكون أو لا أكون
الغرام
اجتياح واحتياج
اندماج وامتزاج
بحر كان نايم وهاج
شفتين ليهم مزاج
يرحلوا لكل الأماكن
مهما كان الاحتجاج
الغرام
انتقام
من ثواني البعد بينا
من ليالينا الحزينة
أرضنا اللي معطرينها
وإحنا بنهز المدينة
بحرنا اللي مجننينه
وإحنا بنشق السفينة
الخجل من كل مرة
تستخبى القبلة فينا
الغرام رحلة مغامر
ماشي فوق برق السحاب
صرخة الريح اللي داخلة
قلبنا من ألف باب
السؤال اللي بنعشق
دهشته وننسى الجواب
صورتي ف عيونك وصورتك
بعد ما نشيل الحجاب
إعلانات رغبة ومعاصي
وإحنا رافضين الحساب
الغرام روحين عرايا
(باحترام)
ورقة التوت اللي بينهم
شايفة نفسها ف المراية
(احتشام)
ابتسامة الدنيا لما
نتحرم م الابتسام
الغرام
قلق الحقيقة
الغرام
طفل الخطيئة
اللي رافض الفطام
الغرام هو الغرام
لا حلال ولا حرام
اختبار أسواره شايكة
حلم ممنوع ع الملايكة
لو شافوه أو داقوا منه.. مرة
يختل النظام
الغرام يعني إحنا واحد
قبل قبل.. وبعد بعد
رغم إن عيونا باصة
ف اتجاهين ضد بعض