«حلاوة المولد.. حديث نشطاء مواقع التواصل».. «تونا»: «أكل الحلاوة هيدخل الواحد التاريخ من أتخن أبوابه».. «ميزو»: «الصين وقفت عاجزة قدام حلاوة المولد».. «محمود»: «الحلويات الناشفة عاملة زي الخرسانة»

يحتفل العالم العربي والإسلامي في مثل هذا اليوم من كل عام، بذكرى مولد النبي محمد، صلى الله عليه وسلم، وتبقى "حلاوة المولد النبوي" من العلامات المميزة في احتفال المصريين بالمولد النبوي، حتى أن المسيحيين ينتظرون هذه المناسبة لشراء حلوى المولد أيضًا مع المسلمين، وهذه هي الخصوصية التي تميز بها الشعب المصري عن غيره من الشعوب.
وبمناسبة المولد النبوي كان حديث النشطاء المصريين عن حلوى المولد، وأخذ النشطاء يعددون من ميزات الحلوى وما يحبون أكله منها، وخاصة "الحمصية واللديدة والفولية"، مؤكدين أن حلوى المولد من الأشياء التي يصعب الاستغناء عنها في مصر.
تعليقات النشطاء
وقال محمود بركات ساخرًا: "المفروض إنهم يزوّدوا الفولية والملبن في علب حلاوة المولد، الشيوخ فين؟ سنان الناس باظت من الحمصية والحاجات البيضا الناشفة زي الخرسانة". وأضاف عمر يماني: "صلوا عليه... وبعد كده كلو حلاوة المولد براحتكو".
وتابعت "تونا": "حلاوة المولد اللى بالحمص دي حلوة". وقالت "FoolishR": "أكل حلاوة المولد بالمعدل ده هايدخل الواحد التاريخ من أتخن أبوابه".
وعلقت منة حازم فقالت: "يا حبيبى يا محمد يا نبى سلام عليك يا رسول سلام عليك يا حبيب سلام عليك صلوات الله عليك المولد النبوى حلاوة المولد".
وقال هشام: "المهم حد جاب حلاوة المولد؟.. هروح بكرة أقبض وأشتري حلاوة المولد". وأضاف محمد إسماعيل: "طب مش النهاردة مولد النبي... فين بقى الكلام بقى بتاع حلاوة المولد وكده".
وقالت أميرة ناصر ساخرة: "عايزين نبتدي crash diet حلاوة المولد.. فيكون كالتالي يوم كامل فزدقية.. يوم كامل فولية وهكذا..". وأضافت "نودز": "احم أنا أكلت حلاوة المولد من أسبوع فات تقريبا".
حصان المولد
وتابع "ميزو": "لحد دلوقتى مشفتش حصان المولد عند بتوع حلاوة المولد.. مش عارف ليه؟ هل عشان السكر غلى ولّا عشان حصان المولد بيكون قزم؟.. الصين عملت كل حاجة وجت على حلاوة المولد والفسيخ ووقفت عاجزة.. كم أنتى عظيمة يا مصر".
وقالت "الآنسة حلويات": "كان بقالي سنين مكلتش حلاوة المولد.. من 14 سنة مثلا.. كل ذكرياتي معاها لما بابا كان بيجيبلنا علبة ويجيب لنينة علبة نروحلها بيها.. اكتشفت إن الحاجات اللي كنت بحبها وكان نفسي فيها مسكرة أوي ومبقتش بحبها anymore واللي حبيتها أكتر الحاجات اللي يعتبر مفيهاش سكر".
وعلقت ريهام ريما قائلة: "هي حلاوة المولد إيه غير شوية فولية على حمصية على ملبن على شوية حاجات ملهومش أي تلاتين لازمة".
خطة مدروسة
وأضافت مروة محمود: "لازم نحط خطة مدروسة لأكل حلاوة المولد، يعني نوزع الحاجات الوحشة على فترات، إلى جانب الحاجات الحلوة عشان يخلصو سوا ومنلبسش فيهم في الآخر". وقال محمد رجب: "وهى علبة حلاوة المولد إيه غير حمصية ولديدة وشوية حاجات فوق بعض".