حودة اللومانجى رئيسا لجمهورية الأميرية المستقلة

منكم لله يا ولاد «أبو سماعين» ياللى بسببكم شربنا المر من كوعنا.. وعلى رأى المثل اللى ما يرضاش بالخوخ يرضى بشرابه.. صحيح يا ولاد الواحد سمع عن رئيس دولة نام بالليل.. الصبح انخلع.. وسمعنا عن رئيس دولة ساب شعبه وطلع يجرى.. وكمان سمعنا عن رئيس دولة سحبوه فى الفجر ودبحوه.. لكن اللى مطير النوم من عينى وخلى نافوخى فتح.. إننا عمرنا ما سمعنا عن شعب نام وصحى لقى نفسه فى دولة تانية..
يا إِخْوَنَّا عايز حد يصحِّينى من الكابوس اللى أنا فيه.. هتقولوا الجدع ده بيخرف والَّا واخد حبتين هلوسة.. والّا يكون ضارب «جوان» بانجو.. محتمل.. لكن هى دى الحقيقة.. إحنا نمنا بالليل وعارفين إننا فى بلدنا وعندنا ريس ورئيس وزرا وعندنا مجلس شورى ورضينا بالغُلب وأتارى الغلب مش راضى بينا..
والحكاية بقى يا إخونا دى حكاية حقيقية لا هى كابوس ولا هى كلام سطل
بعد الثورة كل واحد نفسه فى حاجة بيعملها.. اللى يقطع خط سكة حديد.. واللى يولع مديرية أمن واللى يسرق عربية واللى يبيع حشيش واللى يبنى فى وسط شارع عمومى برج والَّا اتنين.. دى مش حرية يا إخونا.. ده تسيب.. الأمور فلتت وحطت المصايب على دماغنا.. وطقت فى دماغ البلطجية أنهم يأسسوا دولة ويحكموا.. وعلى رأى المثل.. ما تعرفش قيمة أمك غير لما تجيلك مرات ابوك..
يعنى بالبلدى كده المساجد عندنا بدل ما تذيع أذان الفجر أذاعت لنا البيان الأول لرئيس جمهورية الأميرية المستقلة..
أَخُونَا حودة اللومانجى.. وده ليه تاريخ نضالى كبير مع أجهزة الأمن اللى كانت دايما حاطة نقرها منه والعداوة بينهم وبين بعض مستحكمة ولها جذور.. على أساس أن حودة اللومانجى صاحب خمسين قضية.. سرقة بالإكراه وخطف أنثى وهتك عرض.. ده مسجل خطر واتبنى على كتفه ليمان طره وتاريخه النضالى ده هو اللى أَهَّلَه لرئاسة جمهورية الأميرية المستقلة..
ولا الست حرمه «لواحظ فرفشة» بنت «على» المراجيحى.. والمصيبة السودة ديه حطت على دماغنا إزاى؟
والنبى لأحكى ليكو الحكاية بالتفصيل..
إِخْوَنَّا البلطجية جمعوا نفسيهم حسب تخصصاتهم المهنية..
النشالين عملوا ائتلاف والهجامين عملوا ائتلاف والنصابين شكلوا حزب والمسجلين آداب عملوا جمعيات لحقوق الإنسان واتجمعوا بسلامتهم كلهم فى ميدان الأميرية وعملوا انتخابات حقيقية ونزيهة.. لا تزوير ولا غش.. جابو ترابيزة ولعبوا مع بعض جوز وفرد.. وحودة اللومانجى غلبهم كلهم فى لعبة جوز وفرد.. وكسب منهم حتى الهدوم اللى لابسينها..
وفى يوم وليلة شكل حكومة وجاب لينا «أحمد سبرتو» رئيسًا للوزراء.. وعنتر الشفاط للمالية.. وزكى تلوث للصحة.. ومدبولي سوابق للداخلية.
والزعبلاوى لمجلس الشورى.. خلوا بالكوا الزعبلاوى ده مش لقب عيلة دا اسم اللومان اللى هرب منه فى أثناء الثورة..
وجاب الواد «حناطة» سايس الجراج أيام ما كان فيه عربيات عند الناس قبل ما تتسرق وعينه وزير للنقل والمواصلات.
وبقدرة قادر لقينا مكان العربيات يجى خمس تلاف توكتوك.. لدرجة أن الواحد لو قاعد فى بيتهم ونسى نفسه واتَّاوب يدخل فى بقه توكتوك.. والمصيبة الكبيرة بقى إن أَخُونَا حودة اللومانجى عين مراته الست «لواحظ فرفشة» وزيرة للإعلام..
بنت «على» المراجيحى وزيرة يا إخوانا.. ده بوليس الآداب قبض عليها ييجى خُمْسُمِيت مرة تَلَبُّس.. وينزلوها من البيوت ملفوفة فى ملاية سرير.. وفى كل مرة تطلع من القضية زى الشعرة من العجين.. قال إيه الراجل اللى يمسكوه معاها تقول عليه ده حرامى هدوم..
علشان كده اللى يسمع ويشوف غير اللى حلم.. وحودة اللومانجى راجل واضح وما عندوش حاجة يداريها.. والبيان بتاعه عجب الناس كلها وقطعوا إيديهم من التسقيف.. آه ما احنا رجعنا تانى للتسقيف..
الراجل قال إيه بقى فى خطابه الأول؟.. أقول لكو.. هوه قال بالحرف الواحد:
كل رئيس دولة وكل وزير وكل أعضاء مجلس الشورى كانوا يحلفون بالله العظيم أنهم يحافظون على البلاد والعباد وفى الآخر يطلعوا حرامية ويسرقوا البلد واللى فيها.. عشان كده أنا غيرت اليمين الدستورى وعملت يمينا جديدا كل المسئولين تحلف بيه.. وأنا بصفتى رئيس الجمهورية هبدأ بنفسى.. عليا الطلاق بالتلاتة هخلى بالى من البلد ومفيش مواطن هيشتكى من حاجة وأنا بعت طلب انضمام لجامعة الدول العربية للجدع اللى اسمه «نبيل العربى» مع أخوكو «على حريقة» وزير الخارجية.. والحمد لله أخونا رئيس الوزرا لم يعترض ووافق على طول..
وده كان أول بيان لرئيس جمهوريتنا حودة اللومانجى.. قلت لأم العيال: لمى الهدمتين اللى عندنا وهاتى العيلين
وننفد بجلدنا ونروح عند «إبراهيم الدكر» ابن خالتى.. ده واد فتك ومقطع السمكة وديلها وهيقدر يحمينا..
ويا دوب خرجنا لميدان الأميرية واتلم علينا حرس الحدود.. قال إيه ممنوع الخروج من الأميرية إلا بتأشيرة..
وفين جوازات السفر.. يادى الواقعة السودة.. هيه روض الفرج بقت دولة تانية واستقلت قبلنا؟
واتارى أخونا رئيس الوزرا سبق جماهير وشعب المطرية وِتْقَدم بنفسه لنبيل العربى وجعل المطرية جمهورية مستقلة.. ده علشان يخلص منها ومن مشاكلها.. والمصيبة السودة إن الجماعة اللى عاملين نفسهم بتوع ربنا اتقدموا بطلب لرئيس الجمهورية حودة اللومانجى يطلبوا فيه فتح سفارة ليهم فى أى مسجد من مساجد الأميرية.. وده اللى خلانى أنشر إعلانا فى جميع الصحف لبيع خمس جنسيات بسعر متهاود.. لدواعى الهجرة إلى بلاد الواق الواق.