أوصاف النبى

صلى على سيدنا النبى جد الحسن
واتملّى فى الوجه الحَسن
سبحانُه من خلق العيون الوَاسِعه
والجبهه شمس وساطعه
والكحل ربانى ولايق فى الرموش
والننى ليل
مهما سهر فيه الأحبة مايشبعوش.
فى سنانه شق
وطل ياما منه نور
وريقُه عنبر
والعَرَق مِسك الزهور.
والشعر ناعم منبته فوق الجبين
ابيضّ منه بالعدد يادوب عشرين.
فى رجله خُف
النجاشى يودُه بيه
قبطى يهادى
والنبى قِبِل الهدية
وسيفه له قبضة من الفضة وكان
الكف ناعم إنما القبضة قوية
طالت حياتك يا نبى وكفك شَريِف
لا ضربت عبد ف يوم
ولا ضرّيت ضعيف.
يقول ما يُضحِك الصحابه
بس قوله كله حق
أدبك عشان إنت نبى؟
ولاَ نبى بأدبك؟ أنا مالقيتش فرق
قميصه كان من الكتان
وكان أخضر
وخاتم فضه فى يمينه
بفص اسمر
وأما تشوفه فى السكه يشد عينيك
كأنه البدر بالخطوه وجىّ عليك
بيتكلم على مهله
وصمته كلام
ويبكى بحرقه
والضحكه بالابتسام.
الليل يطول ويقصّره بالسجدتين
واما ينام
خده على كفه اليمين
صلى على سيدنا النبى جد الحسن
صلى على سيدنا النبى جد الحسين.
....................
ميلاده كان ف يوم اتنين
وموته كان ف يوم اتنين
أدّى الرساله وتمَّها
بين اليومين.