خالد الجندي لعمرو أديب: «اهدأ وبلاش نفسنة» (فيديو)

يقول الداعية الإسلامى الشيخ خالد الجندى، إن الإعلامى عمرو أديب دائم الهجوم عليه، ويرى الجندى أن سبب هذا الهجوم هو «النفسنة»، وفق ما صرح به عبر فضائية «dmc».
علق الشيخ خالد الجندى، الداعية الإسلامى، على انتقاد الإعلامى عمرو أديب المستمر له ولآرائه، إذ هاجمه عندما أبدى رأيه فى مسألة ارتداء النقاب، وعندما تحدث عن الجنس فى الجنة، مطالبا إياه بأن يدعه يمارس حقه فى التعبير عن رأيه بحرية وديمقراطية. وقال الجندى، خلال حلقة الأربعاء من برنامج «لعلهم يفقهون»، الذى يقدمه على فضائية «dmc»: «شاهدت لقاء الإعلامى العظيم عمرو أديب، وهو إعلامى محترف بيقولو عليه لارى كينج العرب، إنما متفهمش منفسن منى ليه، هو بالذات عنده حالة نفسنة منى مش قادر يطلعها، إيه يا ابنى فيه إيه؟».
وأضاف الجندى: «قبل كدا هاجمنى هجوم واضح وصريح لما اتكلمت فى موضوع النقاب، طب دا رأيى، وأنت راجل ديمقراطى، والمفروض إنك يا راجل يا ديمقراطى تتيح لى الحرية إنى أقول رأيى زيك بالظبط، عندك منبرك بتقول رأيك، وعندى منبرى بقول رأيى، إنما أنت رحت ماسك فيا مرة واحدة وقعدت تقول إزاى وداعية مشهور وهو أنت
وأضاف الجندى: «قبل كدا هاجمنى هجوم واضح وصريح لما اتكلمت فى موضوع النقاب، طب دا رأيى، وأنت راجل ديمقراطى، والمفروض إنك يا راجل يا ديمقراطى تتيح لى الحرية إنى أقول رأيى زيك بالظبط، عندك منبرك بتقول رأيك، وعندى منبرى بقول رأيى، إنما أنت رحت ماسك فيا مرة واحدة وقعدت تقول إزاى وداعية مشهور وهو أنت ناقص شهرة يا أخى»، معلقا: «الله أكبر فى عينيك يا عمرو يا أديب.. إهدأ يا عمرو يا حلو بيبان فى عينيك.. إهدأ ربنا يهديك».
واستكمل الجندى: «أنا عايز أعرف أنت متضايق من إيه إنى قلت رأيى، بيكلم الدكتور سعد الدين الهلالى فى تنظيم الأسرة، وانتفض وتساءل أين كان الشيوخ ومقالوش الكلام دا من زمان ليه؟»، ليجيب الجندى: «أنا ذنبى إيه إن أنت لسة صاحى للموضوع إنهاردة، موضوع تنظيم الأسرة دا حضرتك إحنا اتكلمنا فيه 30 أو 40 مرة، أنا صدعت الناس، قلته وهنقوله وهنعيده، لكن أنا مش مشكلتى إنك لقيت نفسك فجأة بتتكلم أخيرا عن تنظيم الأسرة، ودا شىء جميل أشكرك عليه، أنا وأنت قاعدين فى خندق واحد لصالح الاصطفاف الوطنى، دا كلام جميل، إنما لزمتها إيه فى النص تقوله يا دكتور دول بيتكلموا عن الجنس فى الجنة».
وتابع الجندى: «يا عمرو إهدأ وبلاش نفسنة عشان تقدم رسالة، وبعدين موضوع الجنس فى الجنة دا حاجة مهمة لأنه الحقيقة كشف مستغلى النساء، والى بيبصول للنساء إنهم وعاء للشهوة، وكشف كمان الداعشيين الموجودين بيننا، كشف الناس اللى شايفين إن المرأة هى المكافأة اللى هياخدها اللى هيفجر نفسه، معتمدين على مكافأة أخروية ليس لهم فيها أى استحقاق».
واختتم الجندى: «يا عمرو عايزك تصلى على النبى وتستهدى بالله وتخلينى أشوف شغلى وانت شايف شغلك، إحنا الاثنين فى خندق واحد يمكن قعدة عشاء بينى وبينك تصفى الأمور دى بمشيئة الله».
كان الإعلامى عمرو أديب قد استضاف الدكتور سعد الدين الهلالى، خلال حلقة الاثنين، للحديث عن مسألة تنظيم الأسرة.
وتعقيبا على ما قاله الهلالى إنه من المطلوب أن يكون هناك منظومة قضايا معينة نتعرف من خلالها على ما تحتاجه مصر، قال أديب: «هو يافندم على مدى ال30 سنة اللى فاتوادول، قضية الانفجار السكانى غير واضحة؟ يعنى هل قضية الجنس فى الجنة هى اللى واضحة؟ دخول الحمام بأنهى رجل هى اللى واضحة؟»، وأضاف: «اللى واضح الرزق، اللى واضح الانفجار السكانى، أنا مش قادر أفهم، ليه الشيوخ لم يتصدوا لهذا؟»، ليرد عليه الهلالى: «مش الشيوخ، لأن ربنا بيقول "ألم نجعل له عينين ولسانا وشفتين وهديناه النجدين"».
وأضاف أديب: «قضية الانفجار السكانى قضية بديهية إنك تخلف قليل تعرف تعلمهم أحسن، تخلف كتير هيبقى عندك مصاريف كتير، فالقضية بديهية بالنسبة للبشرية».
كما عقب أديب على ما قاله الهلالى بأن نسبة تنظيم النسل فى المدن منطقية، بخلاف المناطق الريفية والشعبية التى بها الكثرة، فقال: «مستندين لفتاوى دينية».
وتابع أديب: «إحنا مش هنعلم المشايخ، لكن إحنا بنقول تنظر للأمور حولك على الأرض، ما هى مشاكل المجتمع الذى تعيش فيه؟ هى مشكلة رزق، هى مشكلة طعام، مشكلة مال، مشكلة دخل، طب مشكلة الدخل دى سببها إيه؟».