يعني إيه إجازة؟ يعني وقت بتريح فيه دماغك علشان تعرف تكمل حياتك الطبيعية سواء بتشتغل أو بتدرس أو بتدير منزل... الشخص بيحتاج كل شوية يهرب من همومه، من الأماكن.. ناس كتير بتقضي إجازات موسم الصيف فى الساحل الشمالي... ومع وجود العيد مع إجازة الصيف، الناس كمان بقى كتير منها بتقضي الأعياد فى الساحل فبقى المكان اللى بتتلاقى فيه أهالي المحافظات علشان يقضوا "إجازة". فى فترة التسعينيات... إجازة الساحل كانت بسيطة جدا... كان الصبح الناس بتروح البحر فى القرية بتاعته وبالليل بيروحوا لبعض البيت أو كان في مكان فى كل قرية بيلم الشباب زي "صابر" فى مارينا أو ال"clubhouse" فى قرى زي الدبلوماسيين... وكانت الدنيا سهلة وفي إجازة مريحة بيقلع فيها كل شخص "وش" الشغل وبتلاقي كل الأعمار بتتعامل مع بعض وناس كتير. "اتعرفوا على بعض" واتجوزت من وجودهم فى نفس القرية وصداقات كتير حصلت لنفس السبب... جزء كبير من الساحل النهارده بقى "مباراة" فى المنظرة والفشخرة ومنافسة على حجوزات فى أماكن دخولها "صعب" واللى عنده ترابيزة فى مكان بقى "نجم"... دا غير المنافسة بالأجسام اللى كلها "عضل" المدهونة زيت فى البحر... ومسابقة نميمة مين يعرف مين ومين اتجوز مين ومين جاب عربية إيه أو بيت فين... وبتظهر موضات لبس غريبة زي التيشيرتات الحرير الملونة للشباب والمايوهات القصيرة أوي... المنافسة دي خلت الساحل مرهق للناس اللى بتتنافس زي الشغل لو مكنش أكتر فى محاولة إثبات أنهم "جامدين"... ومابقتش الناس مرتبطة بقرية معينة بقى كتير بيدور علي "شمسية شقية" الصبح و"ترابيزة in" بالليل والسعي ورا الاتنين بيتطلب مجهود معين ولبس معين وطريقة كلام معينة... وكل صيف وله موضة، ممكن صيف يبقى إنك تحشر كلام إنجليزي فالنص... صيف تاني إنك تغني شعبي وتروح حاجات شعبي... صيف إنك تتصور مع الحوت أو تتكلم عن الحوت... وطبعا لو بتعرف تحجز فى الأماكن "الجامدة" تبقي تمام جدا وأسهل إنك تخش الشمسية الصبح علشان ترابيزك بالليل.... ده غير كمان إن لازم تعمل "checkin" فى كل حتة علشان تثبت إنك روحت أو ممكن تاخد صورة مع أصيع واحد فى المكان غير كده إنت ماروحتش المكان كله "نصك بس اللى راح".. طيب... هل المنافسة دي بتسعد الناس؟ هل هما كده مبسوطين أكتر ولا زمان كان الساحل أحلى؟ هل المطربين و"الشعبي نايتس" دي فيها ناس فعلا مبسوطين وحبين المزيكا ولا هما "مبسوطين علشان الشعبي موضة"... طيب بالنسبة للأزمة الاقتصادية؟ هل الساحل جزء منها ولا كوكب الساحل تمام ولسة الأزمة ماجتلوش؟ طيب هنفضل كل سنة نبعد لحد مانروح نصيف فى ليبيا فى٢٠٢٠ ولا هتقف عند مطروح؟ وخدانا على فين يا موضة والموجة هتسعدنا ولا هتخلينا نشتغل فى الشتا إن احنا نحاول نعمل فلوس نتمنظر بيها على بعض فى الصيف وخلاص... ستظل السعادة فى نظري فى كباية الشاي فى عشة صغيرة فى راس البر وضحكة من القلب ونزولة بحر قبل زمن الموبايلات وتأجير "فطوطة" على المغرب والتطبيق لحد الفجر اللى بنصليه وننام... مش فى المنافسة والخناقة على الشكليات والحجوزات... بس الإنسان ضعيف وبيضطر يحاول يركب الموجة للأسف.
