المرشد: «الضابط قال لى انت بتقول «الحمدلله» كتير.. ولما شاف المصحف قبض علي واقعة غريبة شهدت أحداثها مدينة العريش الأسبوع الماضى، عندما ألقى القبض على مرشد سياحي بكمين شرطة «بلوظة» أثناء سفره من القاهرة إلى خطيبته، بعد الإشتباه فيه لحيازته «مصحف» وقيامه بالرد على أسئلة ضابط الكمين ب«الحمدلله»، فتم اصطحابه إلى قسم الشرطة وحبسه بدون أسباب..وإلى التفاصيل استهل حمدي محمود عبدالفتاح، 28 سنة، مرشد سياحي، مقيم بشبرا فى القاهرة، قصته قائلاً:« كنت أعمل فى قطاع السياحة لمدة عشر سنوات بمدينة شرم الشيخ وبضرب الطائرة الروسية أصبحت عاطلا عن العمل وعدت إلى القاهرة»، مستكملاً :« منذ شهرين خطبت فتاة من مدينة العريش وأثناء ذهابى لرؤيتها الخميس الماضى، كما يفعل أي خطيب مع خطيبته، لعب سوء الحظ دوره واستوقفني كمين شرطة ( بلوظة) فى تمام الساعة 2 ظهرًا، وأمرني أمين الشرطة بالإطلاع على بطاقتي الشخصية».
وأضاف المرشد في حديثه ل «التحرير» قائلًا: «بعدها أنزلنى ضابط من السيارة الأجرة وسألني عن مهنتي فقلت له أنا لا أعمل وجاء ضابط آخر ووقفت معه وسألته أحضر حقيبتي .. فرفض وبعدها سألني «انت شغال إيه؟» فقلت له «كنت شغال في السياحة في شرم الشيخ وبعدين السياحة اتضربت»، فسألني الضابط «أنت بتشرب سجائر» .. فأجبته «لا الحمدلله»، فعاود سؤالي «هل دخلت القسم قبل كده ؟» فأجبت: «لا الحمدلله». يتابع :«من هنا اختلفت نظرة الضابط لي وأحضر رتبة أعلى وهو معاون المباحث وتفحص البطاقة بدوره وقال لي «اتفضل»، لكن طلبني مرة أخرى بحقيبتي وقال للسائق اذهب انت يا اسطى هو قاعد معانا شوية». وتابع حمدي: «الضابط أخد الموبايل من جيبى وأمرنى بفتحه وكذلك «اللاب توب» من الشنطة وأخذ يفحص اللاب، ووجد غيار ومصحف وقال لي «أنت رايح تبات» فرددت عليه: «أيوه لأني هقعد مع خطيبتي بالتأكيد مش هارجع بالليل»، فسألني الضابط سؤال عجيب: ربنا هداك أمتى؟ فقلت له يعني إيه امتى؟.. فقال «بتقول الحمد لله وبأمر الله كتير يعني» وهنا صمت واستشعرت شرا. وأضاف المرشد السياحي: « قام الضابط بالنداء على أمين شرطة وأجلسني في غرفة لمدة ساعتين ثم جاء لي بالشنطة.. وقال لي «ناقصك إيه فقلت له البطاقة والموبايل»، فتم إصطحابى وأربعة آخرين إلى قسم رمانة وهناك قابلنا ضابط فقال لنا «معلش الشبكة دلوقتي مش شغالة وهتقعدوا شوية نكشف عليكم ونمشيكم»، وأمر أحد الأمناء بادخالنا زنزانة ليس بها فرش ولا طعام وشراب لمدة يوم كامل حتى ثاني يوم الجمعة ومفيش حد دخل يسأل علينا بدون أي تحقيق وكانت الزنزانة منعزلة عن القسم بالكامل". واستكمل: «تاني يوم خرجونا ومعاون المباحث قالي انت شغال إيه؟ فقلت له انا مش شغال ..فقال لي انت مش قلت إمبارح انك شغال في السياحة؟ ..فقلت له انا كنت شغال في السياحة ومن ساعة ما الطيارة الروسية ووقعت مش شغال .. فقال لي انت رايح فين؟ ..اجبته رايح أزور خطيبتي. واختتم مرشد السياحة:«قال لى انتظرنى خارج المكتب وبعدها حصلت على بطاقتي والموبايل بتاعي وقال لي اتفضل، عارف هاتركب ايه؟ قلتله مش عارف قال لي تركب القنطرة وتروح القاهرة وكأنه يقول لي لا تأتي إلى العريش مرة أخرى، وبعدها ركبت وروحت».
