بالفيديو.. عمرو أديب لمرتضى: «ميدو جه خلاص.. محدش يخاف تاني»

قال الإعلامي عمرو أديب، إن الأجواء ملتهبة في برنامجه «القاهرة اليوم» مساء اليوم الإثنين، بسبب ظهور أحمد حسام (ميدو)، مضيفًا «اللى يهمنا بشكل مبدأى إن ميدو ييجي، وإن الحلقة تحصل، ردًا على التهديدات أن الاستوديو هيتكسر وإن أنا هتعلق من رجليا، أنا شخصيًا كعمرو، كل اللى يهمني حضور ميدو، لأن لما ميدو ييجي والحلقة تتعمل ده معناه إننا فى بلد مش في غابة، ومفيش حد يقدر يفرض قوته على حد».
وتابع أديب «كل الناس كانت بتقول إننا هناكل سمك وهنتصالح وهنتراجع، وده محصلش، ميدو هيقول إيه ما يقولش ده موضوع تانى، يقول اللى هو عايزه، وفكرة إن حد كانت معاه عصايا مش هتحصل تاني، كل الناس كانت عندها قناعة إن ميدو مش جاي، وكل حاجة هتبوظ، اللى يهمني إن محدش يخاف، وإن فيه إله واحد فوق فى السما، والبلد دى فيها قانون، وإن المذيعين اللى مدينة الإنتاج الإعلامي تقدر تعمل اللي هي عايزاه، وعشان نخلص من الهري وكلام الناس، ها هو ميدو جه خلاص».
واستكمل، «لا تتخيلوا كمية المحاولات لعدم حضور ميدو للقناة، ونعمل حلقة بشكل عادي جدًا، ما ينفعش حد يتحكم فينا ويخوفنا، محدش يخاف تاني، أي حد يخوفك اوعى تخاف، محدش يقدر يعملك حاجة غير قوتك، الإعلام المصري كله موجود هنا عشان يتأكد غن ميدو جه».