فيديو.. محمود سعد للداخلية: «لحد إمتى هتفضلوا تضربوا الناس على قفاهم؟»

انتقد الإعلامي محمود سعد الانتهاكات التي يرتكبها بعض أفراد الشرطة في حق المواطنين، قائلًا: «لو نستحمل بعض شوية، حضرات الضباط ياريت تأجلوا موضوع الضرب شوية، لو تقعدوا 6 شهور بس من غير ضرب، من غير إهانة، الإهانة دي هتعمل غضب إحنا مش حمله في الوقت ده».
وأضاف سعد، خلال برنامجه «آخر النهار» أمس الجمعة عبر فضائية «النهار»، «وفقًا للتقارير هناك 4 حالات تعذيب من الشرطة في أسبوع والنتيجة وفاة 3 أشخاص، وفي الشوارع كمان انتهاكات، لو إنت شايف الناس زبالة ومش طايقهم، متنزلش تشتغل في الشارع، لازم الظابط اللي يشتغل مع الناس في القسم يقدر يتعامل مع الناس، زيه زي موظف البنك اللي بيتعامل مع الناس بيختاروه بمواصفات خاصة».
وتابع: «إذا كان قد جاز في يوم لك أن تظلم، فتذكر أن دوام الحال من المحال، وأقول للداخلية افتكروا إن الثورة قامت يوم 25 يناير، يوم عيد الشرطة.. إنتوا شايفين أخلاق الشعب مش كويسة، الحمد لله في هيئة بتتشكل للحفاظ على الأخلاق، مش عارفين هتعمل إيه بس أهي موجودة، لغاية ما نشوف الهيئة دي هتعمل إيه، نزلوا ظباط تعرف تشتغل مع الناس».
واستكمل: «وبعدين إيه حكاية الأدب اللي ظهرت عليكوا فجأة دي، وتقعدوا تقولوا لسانكوا طويل، الشعب المصري طول عمره ابن نكتة ودمه خفيف مش لسانه طويل، الموضوع ده لائق عليكم، عايزين تقرفوه ليه، وبعدين لو ظابط أخدنا قفا هكون محترم معاه إزاي، لحد إمتى هتفضلوا تدوا الناس على قفاهم؟».