من كل بستان «في الحضرة»

الحمد لله..
1
الحمد لله خلقنى فقير رقيق الحال
لا طلعْت تاجر ولا سمسار ولا دجال
لا مُسَاوَمَة ولا غِشّ
ولا باشُوف الدُّنيا من خُرْم قِرْش
ولا بَاشيل الميّه فى الغربال!!
2
والحمد لله.. خلقنى حِتّه من ناسى
وبانام براحتى لإن فراشى بمقاسى
مِكفِّى بيتى حلال
وكل مِن شافنى يقول: «يا خال»
عابر سبيل ورأيى من راسى!!
3
الحمد لله سنين عَدِّت وانا مِنِّى
وعمرى ما خنت ولا حتى اللّى خاينينّى
ما املكش غير فنّى
وأسْرَة مِتْحنْدَقَة مِتْشَالَة فى النِّنى
وبيتْ.. جيرانى تزيد فى محبِّتُه عَنِّى!!
4
والحمد لله.. وَهَبْنِى قلم ما بيخونِّيش
عمره ما يمدح وِمِسْتَنّى طلوع العيش
قلم الغلابة بجدّ
ساعة ما تشتدّ الهموم.. يِشْتَدُّ
وساعة الضّنْك بينام ع البُروش والخيش!!
5
وعَمَلْت قُبَّه جميْله وتحتها مَرْقَدْ
فى آخر الرحلة حافرش فيه واتمدَّد
لِنُوم بلا صَحْوة
ماحاخُدْش فى إيد الحياه.. غَلْوَه
تِحدفْنى باكْتَر كتير من عَزْمها.. وابْعَدْ!!