إيمان ل"التحرير": السفر الكتير ساعدني على اختيار أنواع أقمشة مختلفة.. وخلاني أتعرف على الملابس الخاصة بكل بلد واستوحى منها أفكار دراستي للتسويق علمتني أن ما فيش نجاح طول الوقت وأن ساعات النجاح المعنوي أهم بكتير من المادي إيمان فتحي.. مصممة أزياء "مختلفة جدا"، درست إدارة الأعمال في الأكاديمية البحرية الإسكندرية، وبدأت تدخل مجال تصميم الأزياء أثناء دراستها، وقررت تأسيس صفحة ليها على فيسبوك تعرض فيها تصميماتها وتبيعها أونلاين. في حوارها مع التحرير، إيمان قالت إنها واجهت صعوبات كتيرة في البداية، لكنها نجحت في تنسيق الوقت بتشجيع ودعم أهلها وخصوصا والدتها وزوجها. أما مشكلة التمويل، كان أكبر مشكلة واجهتها إيمان في البداية لصغر سنها بعد التخرج، فلجأت إلى مشاركة صديقتها الموهوبة هدى جودة، وحققوا سويا نجاحا كبيرا في فترة صغيرة جدا. تضيف إيمان ل"التحرير": "أضطررت للهجرة خارج مصر لظروف عمل زوجي. سفري المفاجيء كان تحدي بالنسبة لي، وإزاي ممكن أسوق تصميماتي وناس كتير من بلاد مختلفة تشوفها و بالأخص في مصر طبعا عشان كدة لقيت أن الشغل أونلاين أنسب طريقة بالنسبة لي". إيمان عندها ورشة بيساعدها فيها فنيين متخصصين بينفذوا التصميمات اللي بتقوم برسمها وتختار ألوانها وأقمشتها. وتابعت: "السفر الكتير ساعدني على اختيار أنواع أقمشة مختلفة ومتميزة، ده غير أنه خلاني اتعرف على الملابس الخاصة بكل بلد واستوحى منه أفكار استفيد منها في تصميماتي". "إيمان فتحي ديزاينز"، بيجذب المحجبات وغير المحجبات من جنسيات مختلفة. وبخصوص المقاسات، قالت إيمان إنها بتتطلب من العميلة تفاصيل جسمها بالظبط لأن الشراء بيكون عبر الإنترنت سواء من صفحة الفيسبوك أو انستجرام، وعشان ميحصلش أي مشكلات أو شكاوى. لافتة: "دراستي للتسويق علمتني أن ما فيش نجاح طول الوقت وأن ساعات النجاح المعنوي أهم بكتير من المادي". وحلم إيمان تشوف تصميماتها موجودة في كل مكان في العالم. جربتي قبل كدة تجددي ملابس أو إكسسوارات أو أدوات قديمة وترجعي تستخدميها تاني بدل ما تتخلصي منها؟ إيمان قالت إنه في جزء مخصص ل"إعادة التدوير" ضمن مشروعها. وأوضحت أنها بتقدم في صفحتها أفكار متميزة جدا عن الاستفادة من الأشياء القديمة وتجديدها بطريقة سهلة. وأضافت: "طبقت الأفكار دي الأول في البيت عندي، الضيوف اللي كانوا بيجوا يزورني عجبتهم الحاجات المعاد تدويرها دي جدا. ومن ساعتها حبيت أشارك الناس كلها الأفكار دي عشان يحاولوا يعملوا زيها، لكن مش بعرضها للبيع". * سلسلة قامت إيمان بتنفيذها باستخدام شريط كاسيت * قطعة ديكورية استخدمت فيها إيمان حزام قديم * نظارة شمسية قديمة قامت إيمان بتجديدها باستخدام دبابيس المشبك الصغيرة لتعطي لها شكلا مختلفا وجديدا *