قالوا ان العسكر لا يفقه سياسة.........واتضح ان السياسيين لا يفقهون العسكرية

نوفمبر 2009 احدهم :هانعمل اية في موضوع الرياسة ده والبرادعي اللي بيقول هيرشح نفسه هل هنقف جنب البرادعي واللي معاه ولا هنوافق علي التوريث لجمال
اخر :يضحك ويقول بسخرية لا ده ولا ده سيبهم ياكلوا في بعض واحنا هنتوجد في الوقت المناسب
الاول :بس المشير مش هايقبل اننا نقلب علي مبارك
الاخر:صح المشير مع مبارك مش مع ابنه
الاول : انت شايف كدة
الاخر :هو فيه غير كدة
.........................................
يونية 2010
احدهم :واضح ان البرادعي شعبيته بتكتر في الشارع والاخوان واقفين وراه ومكانته الدولية والعيال بتوع النت شكلهم متفقين علي البرادعي .......
شوفت كم الناس اللي حشدوهم في زيارته للعزاء في الواد بتاع اسكندرية خالد سعيد
الاخر:منا قولتلك سيبهم خليها تكبر ونخلص بس ياريت همة بس يطلعوا رجالة ويكملوا ويبقي جات من بعيد
الاول :بس احنا اتفقنا علي رفض التوريث ومحددناش ساعة التحرك
الاخر: هي هتحدد نفسها
...........................................
بداية يناير 2011
الاول : العيال بتوع النت عايزين يعملوا زي تونس وينزلوا الشوارع ويعملوا ثورة
الاخر: ياريت بس ما اظنش احنا نختلف والعادلي عصايته شديدة وهيلمهم
الاول :بس الموضوع بيكبر والدعوة بتنتشر واحتمالية نزول الناس في الشارع كبيرة
الاخر:طيب بيقولوا اية علي الجيش
الاول : كلهم واثقين ان الجيش هيقف معاهم ويبتسم ويكمل لكنهم شاكين في المشير بيقولواانه صاحب مبارك
الاخر: يضحك ويقول والله الشعب المصري ده مالوش حل بس هم ينزلوا
الاول : يعني اية
الاخر: يعني احنا مع الشعب كفاية بقي اللي شافوه وشفناه ماحناعارفين انه خربها
الاول: ده قرارك لوحدك
الاخر : لاء ده قرار كل القيادات
الاول : والمشير
الاخر: المشير هو اول واحد موافق
..................................................
يوم 25 يناير 2011
الاول : مش بقولك هينزلوا الشارع الشوارع مليانة
الاخر: علي خيرة الله .....والداخلية سيباهم محدش بيعترضهم
...... غريبة مش عادتهم يعني
الاول : يمكن بيمتصوا الغضبة الاولي
الاخر :فيه اجتماع علي مستوي كل القيادات غدا او بعد غد مع الريس
الاول :طيب والاتجاه اية
الاخر:الاتجاه هيحدده الشارع
.........................................
الخميس27 يناير
الاخر:فيه احتمال ان الجيش ينزل بكرة الشارع لو الامور تطورت
الاول:ده قرار
الاخر:قرار
الاول:واحنا موقفنا اية
الاخر:موقفنا الحقيقي ولا اللي مطلوب مننا
الاول :الاتنين
الاخر :مطلوب مننا تأمين البلد ومساندة الداخلية في حالة العجز....اما موقفنا الحقيقي اننا لو نزلنا هنبقي مع الشعب ويبقي خلاص خلص الدور
الاول :ربنا يستر
الاخر : هيستر ان شاء الله
...........................................
الجمعة 28 يناير2011
الاخر: الاوامر صدرت بنزول الجيش
الاول: علي خيرة الله
الاخر :تأكدت ان التعليمات وصلت لكل الاسلحة والقيادات بعدم التعامل باي شئ فيه عنف مع الشعب
الاول: تمام ياافندم تم التنفيذ
................................................
ايام 29 و30 و31 يناير 2011
الاول :مافيش جديد يا افندم
الاخر: صدرت اوامر باستخدام القوة لتفريق المتظاهرين واجهاض الثورة
الاول :الناس دي اتجننت
الاخر : ماتخفش احنا بنجهز بيان القوات المسلحة وسوف يلقيه للشعب اللواء اسماعيل عتمان يطمئن الشعب ويوضح موقفنا تحسباً لاي مواقف مستبقة توقع بين الجيش والشعب لانهم بيفكروا في ده وعايزين ده بعد ما رفضنا استخدام القوة ضد الثوار
الاول: حضرتك شايف انها ثورة
الاخر: ثورة وثورة حقيقية من شعب حر ولادنا واهالينا واخواتنا الشعب فاق ومن حقه الحرية والكرامة واحنا معاه وهنحققهاله
الاول:باذن الله يا افندم ونحن لها والبيان اهوه جاهز ومع اللواء اسماعيل وبنسجله
الاخر :تأكدوامن اجراءات اذاعته
الاول:تمام يا افندم هاتسمعه حضرتك في الميعاد المحدد علي شاشة التليفزيون الرسمي
الاخر: ربنا يوفقنا
الاول : ان شاء الله
...............................
يومي 1 و2 فبراير موقعة الجمل 2011
الاول :هو اية اللي بيحصل ياافندم اذاي نسمح بكدة ونوافق علي دخول الناس دي لضرب الثوار في الميدان
الاخر: احنا مش هنضرب دي محاولة اخيرة منهم وهايفشلوا فيها
الاول : بس فيها ناس هتموت
الاخر: كل حاجة ليها تمنها
الاول : بس احنا ماتفقناش علي كدة
الاخر: لسه فيه قيادات واقفة مع مبارك وبتهدد بالضرب فهنسبهم مدنيين في بعض وعلي حسب النتيجة هيكون الموقف
الاول : بس دي مخاطرة
الاخر :محسوبة وهيفشلوا ويبقي كدة كلامنا هيتنفذ بدون معارضة لاننا هنبقي الورقة الاخيرة
الاول : يعني اية
الاخر : يعني ادي اوامر للناس يسهلوا دخول الخيل والجمال وانصار مبارك للميدان
الاول: تمام يا افندم
...................................................
ايام 3و4و5و6و7و8و9 فبراير 2011
الاول : وبعدين يا افندم هنفضل واقفين كدة
الاخر:اصبر الموضوع عايز النفس الطويل اللي نفسه طويل فيهم هيكسب
الاول: بس الشعب هيصعد الامور
الاخر: ياريت خلينا نخلص ماهو لو صعدها هناخد موقف لكن الناس نايمة في الشوارع وساكتين
الاول :خلاص يا افندم هيصعدوا وهيروحوا لقصور الرئاسة في مصر واسكندرية وهايعملوااضراب عام
الاخر: وبيان التنحي جاهز ومستنيهم يصعدوا عشان يتقال
..........................................
يوم 11 فبراير 2011
وتم التنحي واستلم الجيش السلطة..............وقال هو قال انه هيسلم سلطة
ههههههه مش دي النكتة ...النكتة ان الناس صدقت
.........................................................
بعد تاريخ 11 فبراير التواريخ مش هتفرق لانها هتبقي زي قبل يوم 25 يناير
وبدون تواريخ
احدهم : هانعمل اية بعد ما تنحي مبارك فيه مليون سؤال عايزين اجابة
الاخر: مليون سؤال ليه؟؟؟
الاول :يعني ايه
سؤالي مثلا ماه هي سياسةادارة المرحلة الانتقالية ؟؟؟؟؟؟
وما هي اجراءات تسليم السلطة ؟؟؟؟
وكيف ومتي وكل ما يتعلق بالموضوع اذاي يعني مش كل دي اسئلة؟؟؟؟؟
الاخر: هو سؤال واحد بس لازم نجاوب عليه
الاول :اية هو؟
الاخر:اذاي نرجع الناس دي بيوتها؟؟؟؟؟
اما نقل السلطة فالسلطة انتقلت خلاص والحمد لله والتغيير تم والتوريث مات
وشوية الغجر اللي كان لاممهم حسني حواليه من المدنيين الحرامية نلمهم في الحبس ونخلص منهم
اما نقل السلطة فقد تم سلميا والحمد لله ومشروع التوريث اتلغي
يبقي مافيش غير سؤال واحد بس تدور عليه كل سياستنا وافكارنا
كيف تعود هذه الجموع الي بيوتهم
؟؟؟؟؟؟؟؟؟؟؟؟؟؟؟؟؟؟؟؟؟؟؟
....................................
نستكمل في الحلقة القادمة ان شاء الله