اية صلاح .: تجربتى فى الشعر كانت صدفة

يعد الشباب هم اساس المجتمع ودليل توجية وفى اطار حرية الراى والتعبير تظهر مواهب شبابية جديدة يحاولون التعبير عن وجهة نظرهم ومشاعرهم واحلامهم وفى اطار ذلك , التقينا بالكاتبة الشابة : " ايه صلاح " صاحبة ديوان شعر ( العيلة الزحمة ) وكان ل"صوت الأمة " معها هذا الحوار .
ما سبب تسمية كتابك ب ( العيلة الزحمة ) ؟
احد اصدقائى اقترح الاسم بس انا كنت فى البداية رافضه جدا , بس فكرت مرة اخرى واكتشفت ان بالفعل الزحمة موجودة فى كل حاجة فى حياتى , والكتاب زحمة لان بيضم قصائد مختلفة عن بعضها البعض وكل قصيدة مختلفة بذاتها وفى جزء من الكتاب قصائد بالعامية وغيرها بالفصحة , وفى جزء فى الكتاب اسمه ( اسمع مع القصيدة ) ناس استغربت جدا الموضوع دا لكن القصيدة دى فعلا محتاجة تكون تحت تاثير اغنية معينة فاستقريت على الاسم والناس عجبها جدا .
( العيلة الزحمة ) اول ديوان شعر بالنسبة لك , مين اللى شجعك انك تاخدى الخطوة دى ؟
بالصدفة انا كنت اعرف مديرة دارروعة للنشر ( ا.هبة الشرقاوى ) , كلمتها ان انا كاتبة حاجة شعر بس انا بكتبها على ( الفيسبوك ) وعايزة رايك فيها عجبها جدا وقالتلى ممتاز بشكل غريب وقالتلى انا عايزة الكتاب يلحق معرض الكتاب باى شكل , كان قبل معرض الكتاب بثلاثة ايام فقط , وفعلا الكتاب نزل سادس يوم فى المعرض وانا استعجلت بى جدا وهى كانت ملحة عليا جدا انى اخلصه عشان يلحق المعرض ودا كان محمسنى جدا .
اكتشفتى مهارتك فى الكتابة امتى ؟؟
لما شاركت فى مسابقة ( نفسى ابقى مذيع ) لراديو بص وطل , جربت اكتب شعر والناس تقولى ارائهم , وفى احد المرات حد من اصدقائى نصحنى انى اكتب بالعامية فجربت الكتابة بالعامية واكتشفت انه احلى وحسيت انه واقعى اكتر .
اغلب الكتاب بتبدا موهبتهم من الطفولة . هل دا حصل معاكى ؟
لا, انا الشعر بدا معايا صدفة فعلا وانا مكنتش من محبى الشعر وقراته لانى مش بحب المبالغات اللى فى الشعر , واكتر حاجة عجبانى فى القصيدة ان كل قصيدة فيها فكرة يعنى قصيدة ( اعرابك ايه ) بشرح اعرابك فى الحياة سكون او رفع او مجرورة او فى قصيدة تانية حوار بينى وبين البحر مثلا .
احكلينا اكتر عن كتابك بتناقشى فى ايه ؟؟
بناقش فى كل حاجة خاصة بالبنت اللى شبهى وشبهك وانا سميته العيلة لانى بكتب عن هاجر عن ليلى عن كل بنت , فى قصيدة ( اسمها انا العمية ) بتكلم عن بنت خايفة تبقى كفيفة , او ( ليلى ) اللى بتتعرض للاضطهاد مجرد انها انثى , (ريحتك فيها اوضح ) ودى اقرب قصيدة لقلبى .
نفسك كتابك يوصل ايه للقارئ او ايه الهدف من الكتاب ؟؟
يعنى كل واحد يقراه يحس فى نفسه يعنى لما يقرا القصيدة يقول انها بتعبر عن نفسه او انه لو هو اللى كاتبها هيكتبها لفلان مثلا .
ايه مشروعاتك القادمة ؟
انا مش بفكر اعمل حاجة جديدة دلوقتى غير لما احس بنجاح الكتاب اللى انا عايزه , لكن الكتاب هيكون من ضمن الكتب اللى هتشارك بيها دار روعة للنشر فى مهرجان الكتب بالرياض قريبا ان شاء الله .
ايه اكتر رد فعل على الكتاب اثر فيكى وعجبك ؟
احلى حاجة فى الدنيا كان رد فعل ماما انها تتاثر بالكتاب وقالتلى انها حاسة نفسها فى الكتاب دا شى فرحنى جداااا , وهى قراته لاول مرة لما نزل , وردود افعال الناس وتعليقاتكم كانت بتشجعنى , يعنى فى حد كلمنى قالتلى انها كنت محتارة فى موضوع ما وعرفت القرار لما قريت القصيدة وارتحت جدا بعدها دا كان اكتر حاجة بجد اسعدتنى وفرحتنى جدا.
تحبى تقولى ايه لاى حد عنده موهبة و لسه هبيدا اول كتاب ؟
انه يكون مقتنع بموهبته وعنده ثقة فنفسه , انا كنت خايفة اقدم للدار و مكنتش مقتنعة انها على المستوى المطلوب وان حد يقتنع بيها ويدفع فيها فلوس بس الحمد لله قدرت اخلص الكتاب وينزل فى المكتبات .