السلطانية!

يوميات مواطن مفروس

علي طريقة نانسي عجرم.. أخاصمك آه.. أسيبك لأ، أعلنت أمريكا أنها واخدة علي خاطرها من إسرائيل، لأنها تعمدت إحراجها في المنطقة، وأعلنت عن بناء مستوطنات جديدة أثناء زيارة نائب الرئيس الأمريكي، اللي بقي في نص هدومه ياضنايا، وبقي ماشي زي الأراجوز والعيال تختمه علي قفاه بنجمة داود.
علي طريقة الحاج مرزوق العتقي أو الصرماتي، الذي ربط السلطانية فوق دماغه، ونط في البحر، بعد ما راحت المركب ستميت حتة، ربط العرب السلطانية فوق دماغهم.. علي اعتبار أنها تاج الجزيرة، وأجدع من العمة والطربوش والدشداشة، ونطوا في المواخير الليلية، واللحم الأبيض المتوسط، ثم بدأوا يدبون أصابعهم الغليظة في عيون بعضهم، وراحت القضية الفلسطينية ستميت حتة، وحتي هذه اللحظة، لم يخلع واحد منهم السلطانية من فوق دماغه، ربما لتحميه من وهج الصحراء،والفكر ووجع الدماغ، أما القدس فلها رب يحميها، وكفاية الخطباء كل يوم جمعة بعد الصلاة، بيدعوا عليهم ربنا يهدهم ويكسحهم البعدا، ويورينا فيهم يوم.
وعلي طريقة الحاج علي كرشة، بتاع اضرب المربوط يخاف السايب، قام المغاوير بتوع حماس بضرب المربوط، اللي هما المناكيد المناحيس بتوع فتح، حتي يخاف السايب اللي هي إسرائيل، وزيادة في بث الخوف والرعب في قلوب الأوغاد الإسرائيليين، الذين يحاولون منذ سنوات تهويد القدس، قام المغاوير بشن حرب مقدسة ضد الجنود المصريين علي الحدود، علي اعتبار أن الأنفاق، هي الطريق الوحيد لوصول القدس إلي بر الأمان، بدلاً من خنقة المواصلات، والحواجز الإسرائيلية، المنتشرة في كل حتة، والتي لا تستطيع القدس المرور منها، حتي لو تنكرت في شكل حاخام يهودي، برضه هايقفشوها ويبهدلوها آخر بهدلة، وهي جتتها مش خالصة، وشايلة في بطنها وعلي كتفها.
وعلي طريقة نانسي عجرم.. أخاصمك آه.. أسيبك لأ، أعلنت أمريكا أنها واخدة علي خاطرها من إسرائيل، لأنها تعمدت إحراجها في المنطقة، وأعلنت عن بناء مستوطنات جديدة أثناء زيارة نائب الرئيس الأمريكي، اللي بقي في نص هدومه ياضنايا، وبقي ماشي زي الأراجوز والعيال تختمه علي قفاه بنجمة داود، لكن الحمدلله.. إن الدول العربية سترت الراجل، وأعلنت احتجاجها وشجبها، وهددت بعمل أعمال سفلية للإسرائيليين عشان العفاريت تلبس جتتهم ويبقوا مسخرة لشعوب الأرض.
لقد كنا نغني زمان قبل ظهور مغاوير حماس.. القدس هاترجع لنا، وأصبحنا نغني الآن.. القدس راحت مننا.. وما حدش خايب قدنا.
محمد الرفاعي