القوالب نامت والأنصاص قامت!

بالبلدى

· بصراحة ماحدش عارف فين الحقيقة في صراع مرتضي وشوبير
عايز أتكلم في موضوعين مهمين شاغلين بال المصريين في الأيام اللي إحنا بنعيشها ديه.
الموضوع الأول هو وصول منتخب مصر إلي كأس العالم 2010 بجنوب أفريقيا وإن إحنا لازم نكسب الجزائر 3 / صفر علشان نوصل كأس العالم إن شاء الله.
وعلشان نكسب الجزائر لازم يكون اللي هيلعبوا الماتش يعرفوا إنها مباراة حياة أو موت للمصريين، ولازم اللاعبين يعرفوا برضه أن جمهور مصر اللي هيروح الاستاد يوم 14 نوفمبر لن يقبل إلا الفوز حتي نفرح جميعا بالوصول لكأس العالم بإذن الله وبركاتك يا كابتن حسن شحاتة.
الموضوع الثاني اللي شاغل بال المصريين وبيتكلموا فيه هو خناقة مرتضي منصور وأحمد شوبير وفضيحة «السي دي» الذي يوزعه مرتضي منصور ويتهم فيه أحمد شوبير بالاتجار بالمخدرات وحاجات تانية يتهم فيها مرتضي منصور أحمد شوبير.
وبصراحة ماحدش عارف فين الحقيقة في صراع مرتضي وشوبير والطريف أن كل واحد يؤكد للثاني أنه سيحبسه ويسجنه «يعني فيه واحد من الاثنين سوف يدخل السجن يا إما مرتضي يا إما شوبير».
كلمة أخيرة للمطرب الشعبي سعد الصغير اللي أقوله: يا ابني أنت فين والزعيم عادل إمام فين علشان تتجرأ وتقول إن فيلمك أحسن من فيلم الزعيم.. لا فعلا صدق المثل اللي يقول «القوالب نامت والأنصاص قامت».